مەملەكەت باسشىسى قاسىم-جومارت توقايەۆ بۇگىن قازاقستان ينۆەستورلار قاۋىمداستىعىنىڭ ءتوراعاسى بولات اقشولاقوۆتى قابىلدادى. پرەزيدەنتكە ينۆەستورلار قاۋىمداستىعى قىزمەتىنىڭ باسىم باعىتتارى مەن نەگىزگى باستامالارى تانىستىرىلدى. بۇل ۇيىم مەملەكەت باسشىسىنىڭ اقپان ايىنداعى ءىرى بيزنەس وكىلدەرىمەن كەزدەسۋدە بەرگەن تاپسىرماسىنا ساي قۇرىلعان بولاتىن، دەپ حابارلايدى Dalanews.kz اقوردانىڭ باسپا ءسوز قىزمەتىنە سىلتەمە جاساپ.
كەزدەسۋدە:
- قاۋىمداستىقتىڭ مەملەكەت پەن ينۆەستورلار اراسىنداعى دانەكەرلىك ءرولىن كورسەتەتىن اۋقىمدى كۇن ءتارتىبى تالقىلاندى؛
- ەڭ الدىمەن شەشىلۋگە ءتيىس مىندەتتەر رەتىندە ەكونوميكانى ىرىقتاندىرۋعا، مەملەكەتتىڭ بيزنەسكە ارالاسۋىن ازايتۋعا، مەملەكەتتىك باسقارۋ جۇيەسىنە سيفرلىق شەشىمدەر مەن جاساندى ينتەللەكت تەحنولوگيالارىن ەنگىزۋگە باسا ءمان بەرىلدى؛
- سالىق جۇيەسىن جاڭعىرتۋ، مونوپولياعا قارسى ساياساتتى جەتىلدىرۋ، جەكەشەلەندىرۋدىڭ تيىمدىلىگىن ارتتىرۋ جانە مەملەكەتتىك ساتىپ الۋدى رەفورمالاۋ ماسەلەلەرى قوزعالدى.
بولات اقشولاقوۆ پرەزيدەنتكە وتاندىق بيزنەستىڭ ۇلتتىق رەيتينگىن ىسكە قوسۋ جونىندەگى ۇسىنىسىن جەتكىزدى.
قاسىم-جومارت توقايەۆ بۇل باستامالاردى قولداپ، ينۆەستيسيالىق كليماتتى جاقسارتۋ جانە ورنىقتى ەكونوميكالىق ءوسىمدى قامتاماسىز ەتۋ تۇرعىسىنان ولاردى جۇزەگە اسىرۋ ماڭىزدى ەكەنىن اتاپ ءوتتى.
بۇعان دەيىن سايتىمىزدا "قازاقستاننىڭ بيزنەس ەليتاسى جاڭا وداق ءتوڭiرەگiنە توپتاسۋدا" دەگەن ماتەريال جاريالانعان بولاتىن.
