– جەرگىلىكتى اتقارۋ قىزمەتىندەگى مەملەكەتتىك ورگاندار حالىقتىڭ ءال-اۋقاتىن كوتەرۋدى كوزدەيتىن الەۋمەتتىك ساياساتتى جۇزەگە اسىرىپ جاتىر. الايدا باسپانا جايى ءالى دە وزەكتى كۇيىندە قالىپ وتىر. ءبىز حالىقپەن جۇزدەسىپ، كەزدەسۋ وتكىزگەن كەزدە تۇرعىنداردىڭ دەنى وسى ماسەلەنى قوزعادى، – دەدى ول.
وسى ورايدا سەناتور ازاماتتارعا پاتەر الۋعا كومەكتەسەتىن قانشاما مەملەكەتتىك باعدارلاما بار ەكەنىن اتاپ ءوتتى.
«بۇگىنگى تاڭدا مەملەكەت «وڭىرلەردى دامىتۋ – 2020» باعدارلاماسىن جۇزەگە اسىرۋدا. باعدارلاما نەگىزىندە بىرنەشە باعىت بويىنشا تۇرعىن ۇيلەر سالىنادى. ياعني، جەرگىلىكتى اتقارۋشى ورگانداردا كەزەكتە تۇرعان، تۇرعىن ءۇي قۇرىلىس جيناق بانكى، قازاقستان يپوتەكالىق كومپانياسى، «سامۇرىق قازىنا» جىلجىمايتىن مۇلىك قورى» اق، اپاتتى تۇرعىن ۇيلەر بويىنشا»، - دەدى ول.
الايدا، دارحان قالەتايەۆتىڭ پىكىرىنشە، بۇل باعدارلامالار بويىنشا جاس وتباسىلارعا قويىلاتىن تالاپ تىم جوعارى ەكەن.
– وتباسىلارعا (جوعارىدا اتالعان مەملەكەتتىك باعدارلامالار بويىنشا – اۆتور) پاتەر العان كەزدە جاسقا شەكتەۋ قويىلادى. كەيبىر تالاپ بويىنشا ەرلى-زايىپتىلاردىڭ مىندەتتى تۇردە بالالارى بولۋى كەرەك. سونداي-اق، نەكەدە 3 جىل تۇرۋى ءتيىس. ءوزىنىڭ الەۋمەتتىك جاعدايىن جاقسارتۋدى ويلاعان جاستار وتباسى قۇرۋدى كەيىنگە قالدىرىپ جاتادى. سوندىقتان (مەملەكەتتىك باعدارلامالار بويىنشا پاتەر بەرىلگەن ۋاقىتتا – اۆتور) جاس وتباسىلاردىڭ جاس مولشەرىن قايتادان قاراپ شىعۋ قاجەت، – دەدى ول.
وسىعان بايلانىستى سەناتور پرەمەر-مينيسترگە ارنايى ۇسىنىس جاسادى. ونىڭ ايتۋىنشا، جاس وتباسىلارعا قويىلاتىن جاس شەكتەۋىن 29-دان 35-كە دەيىن كوتەرۋ قاجەت.
– باقىتجان ءابدىر ۇلى، مەملەكەتتىك باعدارلامالار بويىنشا قويىلاتىن كەيبىر كاتەگورياداعى جاس مولشەرىن 35-تەن 39-عا دەيىن، ال جاس وتباسىلار ءۇشىن 29-دان 35-كە دەيىن كوتەرۋ قاجەت، – دەدى ول.
