قوجالىقتىڭ جۇمىسىمەن تانىستىرعان سەرىكتەستىك يەسى مارات مىرزاحمەتوۆ بۇگىندە مەملەكەت تاراپىنان كورسەتىلىپ وتىرعان قولداۋدىڭ ناتيجەسىندە كاسىبىن دوڭگەلەتىپ وتىرعانىن ايتادى.
ونىڭ اتاپ وتكەنىندەي، وتكەن جىلى 1 گەكتار جىلىجايدان 75 توننا قىزاناق، 3،5 گەكتار جەردەن 125 توننا باقشا ونىمدەرىن العان. 8 ادامدى جۇمىسپەن قامتىپ وتىر ول بيىل دا جىلىجايدا قىزىناق ءوسىرىپ، ەگىستىككە اسقاباق داقىلىن ەككەنىن مالىمدەدى.
مەملەكەت قولداۋىن كورىپ وتىرعان جالعىز قوجالىق ەمەس بۇل. سونىمەن قاتار سىراباد ەلدى مەكەنىندەگى «ەۆەرەست» شارۋا قوجالىعى دا قاناتىن كەڭگە جايىپ كەلەدى. ماقتا، جوڭىشقا، باقشا شارۋاشىلىعىمەن اينالىساتىن سەرىكتەستىك 1997 جىلى قۇرىلعان. شارۋاشىلىق وتكەن جىلى 24 توننا جوڭىشقا، 60 توننا باقشا داقىلدارىن وندىرگەن. ال بيىلعى جىلى 2،45 گەكتار جەرگە ماقتا، 1 گەكتار القاپقا باقشا، 1 گەكتارعا جوڭىشقا داقىلىن ەگىپ، اگروتەحنيكالىق ءىس-شارالاردى ءتيىمدى ۇيىمداستىرىپ وتىر.
جالپى اۋداندا بيىلعى جىلى 138 مىڭ گەكتاردان استام سۋارمالى جەرگە اۋىل شارۋاشىلىعى داقىلدارى ەگىلگەن. ونىڭ 27 064 گەكتارىن باقشا داقىلدارى قۇرايدى. ناقتىراق ايتساق، بيىل مىرزاشولدىك باعباندار 19 500 گەكتارعا قاۋىن، 7 564 گەكتارعا قاربىز ەككەن. ال وبلىس بويىنشا 51،5 گەكتار جەرگە باقشا داقىلدارى ەگىلگەن.
