وسىلايشا مەرەيتويدى 3 كۇن بويى اتاپ وتكەن ماقتاارالدىقتار ۇلتتىق ويىنىمىزدى جاڭعىرتتى. اۋدان كاسىپكەرلەرى جانە سپورت جاناشىرلارىنىڭ دەمەۋشىلىگىمەن وتكەن سايىسقا قر-ى كوكپار فەدەراسياسىنىڭ پرەزيدەنتى مۇحتارحان دىلدابەكوۆ ارنايى قاتىستى.
جيىندا ەڭ العاش ءسوز العان اۋدان اكىمى ب.اسانوۆ بىرنەشە بەلسەندى ازاماتتاردى ارنايى ماراپاتتاپ، ءسوز سويلەدى.
«3 كۇننەن بەرى اتاپ ءوتىپ جاتقان مەرەيتويىمىزدىڭ اشىلۋ سالتاناتىنا وبلىس باسشىسى ج.تۇيمەبايەۆتىڭ ءوزى قاتىسىپ، ماقتاارالدىقتارعا دەگەن ىزگى تىلەگىن ارنادى. سونداي-اق، الىس-جاقىن جەرلەردەن بىزدەن تۇلەپ ۇشقان اتاقتى تۇلەكتەر قوناققا كەلىپ، كورشىمىز وزبەكستاننان ءبىر توپ دەلەگاسيا شاقىرىلدى. ءبىرىنشى كۇن اۋدان ورتالىعى مىرزاكەنت كەنتىندە، ەكىنشى كۇن اتامەكەنىمىز اتاكەنت كەنتىندە ونداعان ءىس-شارالار ءوتتى. مىنە، بۇگىن ءۇشىنشى كۇن ءدۇبىرلى تويىمىزدى جالعاستىرىپ، شارتاراپقا جار سالىپ، كوكپار وتكىزۋدەمىز. كوكپار – قازاقتىڭ قانىنا سىڭگەن ونەر. قالىڭ ءنوپىردى قاق جارىپ بارىپ، دودا ورتاسىنان سەركەنى سۋىرىپ شىققان شاباندوزىن كورگەندە جۇرەگى تۋلامايتىن قازاق بار ما؟! سوندىقتان، اۋدانىمىزدىڭ 90 جىلدىق مەرەيتويىنا ارنالعان ءدۇبىرلى كوكپارعا ساتتىلىك تىلەي وتىرىپ، بارشا جەرلەستەرىمىزدى مەرەيتويمەن تاعى دا قۇتتىقتايمىن!» - دەدى باقىت ءناسىرحان ۇلى.
جىگىتتەردىڭ باتىلدىعى مەن ەپتىلىگى، كۇش-جىگەرى مەن توزىمدىلىگى سىنعا تۇسەتىن كوكپار ويىنى اتادان بالاعا مۇرا بولىپ كەلە جاتقان ۇلتتىق قۇندىلىعىمىز. ىقىلىم زاماننان بەرى قانىمىزعا سىڭگەن قاسيەتىمىزدى دارىپتەۋ ماقساتىندا وتكەن ماقتاارال اۋدانىنىڭ 90 جىلدىعىنا ارنالعان كوكپارعا كورشىلەس جامبىل، قىزىلوردا وبىلىستارىنان جانە تۇركىستان وبلىسىنىڭ بارلىق اۋداندارىنان مىڭعا تارتا كوكپارشى قاتىستى.
اتالمىش شاراعا قاتىسقان ق ر كوكپار فەدەراسياسىنىڭ پرەزيدەنتى، ءمىرزاشول توپىراعىنىڭ تۇلەگى مۇحتارحان دىلدابەكوۆ:
«ماقتاارالدىڭ توپىراعىنا اۋناپ، نانىن جەپ، سۋىن ىشكەن ۇلدارىڭنىڭ ءبىرى مەنمىن. ەڭبەكپەن ەرىن ەرتە ەسەيتىپ، دوداعا تۇسسە الدىنا جان سالمايتىن نەبىر مىقتىلاردى تاربيەلەگەن ماقتالى ولكە – كيەلى مەكەنىمىز. بارشاڭىزدى مەرەيتويمەن قۇتتىقتايمىن»
- دەدى.
الەمدىك دەڭگەيدە مويىندالعان قازاقتىڭ كوكپار ويىنىنا جينالعان ەلدىڭ دە قاراسى قالىڭ بولدى. كونەكوز قاريالار ۇلتتىق قۇندىلىقتارىمىزدى ناسيحاتتاپ، جاستار اراسىندا دوستىق پەن بىرلىكتى نىعايتۋ ماقساتىندا كوكپار ويىنىنىڭ شىعۋ جانە دامۋ تاريحى جايىندا جاستارعا عيبراتتى اڭگىمەلەرىن ايتتى. كوكپار سوڭىندا سالىم سالعان شاباندوزدارمەن قاتار ويىن بارىسىندا ەپتىلىگىمەن كوزگە ءتۇسىپ، كوپشىلىكتىڭ ىقىلاسىنا بولەنگەن قۇرىش بىلەكتى جىگىتتەر، بابى مەن باعى قاتار شاپقان سايگۇلىك اتتار دا ۇيىمداستىرۋشىلار تاعايىنداعان ارنايى نوميناسيالارعا يە بولدى.
