Osylaisha mereitoidy 3 kún boiy atap ótken maqtaaraldyqtar ulttyq oiynymyzdy jańǵyrtty. Aýdan kásipkerleri jáne sport janashyrlarynyń demeýshiligimen ótken saiysqa QR-y Kókpar federatsiiasynyń prezidenti Muhtarhan Dildábekov arnaiy qatysty.
Jiynda eń alǵash sóz alǵan aýdan ákimi B.Asanov birneshe belsendi azamattardy arnaiy marapattap, sóz sóiledi.
«3 kúnnen beri atap ótip jatqan mereitoiymyzdyń ashylý saltanatyna oblys basshysy J.Túimebaevtyń ózi qatysyp, maqtaaraldyqtarǵa degen izgi tilegin arnady. Sondai-aq, alys-jaqyn jerlerden bizden túlep ushqan ataqty túlekter qonaqqa kelip, kórshimiz Ózbekstannan bir top delegatsiia shaqyryldy. Birinshi kún aýdan ortalyǵy Myrzakent kentinde, ekinshi kún atamekenimiz Atakent kentinde ondaǵan is-sharalar ótti. Mine, búgin úshinshi kún dúbirli toiymyzdy jalǵastyryp, shartarapqa jar salyp, kókpar ótkizýdemiz. Kókpar – qazaqtyń qanyna sińgen óner. Qalyń nópirdi qaq jaryp baryp, doda ortasynan serkeni sýyryp shyqqan shabandozyn kórgende júregi týlamaityn qazaq bar ma?! Sondyqtan, aýdanymyzdyń 90 jyldyq mereitoiyna arnalǵan dúbirli kókparǵa sáttilik tilei otyryp, barsha jerlesterimizdi mereitoimen taǵy da quttyqtaimyn!» - dedi Baqyt Násirhanuly.
Jigitterdiń batyldyǵy men eptiligi, kúsh-jigeri men tózimdiligi synǵa túsetin kókpar oiyny atadan balaǵa mura bolyp kele jatqan ulttyq qundylyǵymyz. Yqylym zamannan beri qanymyzǵa sińgen qasietimizdi dáripteý maqsatynda ótken Maqtaaral aýdanynyń 90 jyldyǵyna arnalǵan kókparǵa kórshiles Jambyl, Qyzylorda obylystarynan jáne Túrkistan oblysynyń barlyq aýdandarynan myńǵa tarta kókparshy qatysty.
Atalmysh sharaǵa qatysqan QR Kókpar federatsiiasynyń prezidenti, Myrzashól topyraǵynyń túlegi Muhtarhan Dildábekov:
«Maqtaaraldyń topyraǵyna aýnap, nanyn jep, sýyn ishken uldaryńnyń biri menmin. Eńbekpen erin erte eseitip, dodaǵa tússe aldyna jan salmaityn nebir myqtylardy tárbielegen maqtaly ólke – kieli mekenimiz. Barshańyzdy mereitoimen quttyqtaimyn»
- dedi.
Álemdik deńgeide moiyndalǵan qazaqtyń kókpar oiynyna jinalǵan eldiń de qarasy qalyń boldy. Kónekóz qariialar ulttyq qundylyqtarymyzdy nasihattap, jastar arasynda dostyq pen birlikti nyǵaitý maqsatynda kókpar oiynynyń shyǵý jáne damý tarihy jaiynda jastarǵa ǵibratty áńgimelerin aitty. Kókpar sońynda salym salǵan shabandozdarmen qatar oiyn barysynda eptiligimen kózge túsip, kópshiliktiń yqylasyna bólengen qurysh bilekti jigitter, baby men baǵy qatar shapqan sáigúlik attar da uiymdastyrýshylar taǵaiyndaǵan arnaiy nominatsiialarǵa ie boldy.
