Memleket basshysy Ishki ister ministri Erjan Sádenovti qabyldady, dep habarlaidy dalanews.kz.
Prezidentke eldegi kriminogendik ahýal jáne qoǵamdyq qaýipsizdik pen quqyqtyq tártipti qamtamasyz etý jónindegi tapsyrmalarynyń oryndalý barysy týraly baiandaldy.
Qasym-Jomart Toqaevqa biylǵy toǵyz aidyń qorytyndysy boiynsha qylmys deńgeii 15 paiyzǵa tómendegeni jóninde málimet berildi. Naqty aitqanda, ótken jylmen salystyrǵanda azaiǵan qylmys sany 11 myńnan asady. Qylmystyń asa aýyr túrleri, sondai-aq qoǵamdyq oryndarda, kóshelerde, otbasylyq-turmystyq salada, kámeletke tolmaǵandar men buryn sottalǵandar arasynda quqyq buzýshylyqtar kemigen.
Memleket basshysyna ótken jyldary 2,5 myńnan astam qylmys ashylǵany aityldy. Kriminalistikanyń zamanaýi quraldary, sonyń ishinde DNQ zertteýleri kóp jyl buryn jasalǵan qylmystarǵa qatysy bar adamdardy anyqtaýǵa múmkindik berip otyr.
Erjan Sádenov qoǵamda quqyqtyq tártipti buzýǵa tózbeýshilik daǵdysy ornyǵyp kele jatqanyn baiandady. Jurtshylyq politsiianyń Zań men tártipti júzege asyrýyna belsendi túrde kómektesedi. Jyl basynan beri azamattardyń, volonterler men qoǵamdyq kómekshilerdiń aqparaty boiynsha 12 myńnan asa ákimshilik quqyq buzýshylyqtyń joly kesilip, 357 qylmys ashyldy.
Jazanyń bultartpastyǵyn qamtamasyz etýge sheteldik quqyq qorǵaý organdarymen ózara is-qimyl yqpal etip keledi. Izdeýde júrgen 1039 adam tabylyp, syrt elderde boi tasalap júrgen 154 adam ustaldy. Shet memleketterdiń suraýy boiynsha Qazaqstan aýmaǵynda 537 qylmysker quryqtaldy.
Prezidentke Ishki ister ministrligi tergep jatqan qylmystyq ister boiynsha jyl basynan beri 49 milliard teńge qaitarylǵany jóninde aityldy. Bul ótken jyldyń osy kezeńimen salystyrǵanda 22,5 paiyzǵa kóp. Internet-alaiaqtyqtan zardap shekken azamattarǵa 6,5 milliard teńgeden astam qarajat qaitarylǵan. Mundai qylmystyń sany 21 paiyzǵa azaidy. Olardyń jolyn kesý maqsatynda 8,7 myń alaiaqtyq jáne fishingtik sait, sondai-aq 187 million alaiaqtyq qońyraý buǵattaldy.
Qasym-Jomart Toqaevqa qoǵamdyq qaýipsizdikti qamtamasyz etýdiń tsifrlyq tetikterin damytý jóninde aqparat berildi. Beinebaqylaý jelisiniń kómegimen 2,2 myńnan astam adam anyqtalyp, ustalǵan. Tsifrlyq sheshimder jol qaýipsizdigin qamtamasyz etý úshin de belsendi qoldanylyp jatyr. Bul sharalar profilaktikalyq jumysty kúsheitip, jol-kólik oqiǵalarynyń sanyn 5 paiyzǵa tómendetýge múmkindik berdi. Sonymen qatar qaza tapqandar sany 16 paiyzǵa, jaraqat alǵandar 7 paiyzǵa azaiǵan.
Kezdesý sońynda Memleket basshysy eldegi quqyqtyq tártip pen qoǵamdyq qaýipsizdik deńgeiin odan ári arttyrýǵa baǵyttalǵan birqatar tapsyrma berdi.
