"The Finiko" qarjy piramidasynyń qurylymdyq bólimshesin basqardy degen kúdikke ilingen tulǵa Túrkiiadan Qazaqstanǵa qaitaryldy, dep habarlaidy dalanews.kz.
Qarjylyq monitoring agenttiginiń málimetinshe, kúdikti 2022 jyldan beri halyqaralyq izdeýde bolǵan. Ony Qazaqstanǵa jetkizý operatsiiasyna Almaty qalasy boiynsha QMA departamenti, Interpoldyń Ulttyq ortalyq biýrosy jáne prokýratýra organdary qatysqan.
Tergeý dereginshe, "The Finiko" naqty kásipkerlik nemese investitsiialyq qyzmetpen ainalyspaǵan. Buryn tartylǵan qatysýshylarǵa tólem jańa salymshylardan túsken qarajat esebinen júrgizilgen.
Osy shema arqyly tabys túsip jatqandai áser qalyptastyrylyp, azamattardan jańa qarajat tartý jalǵasqan.
QMA málimeti boiynsha, kúdiktiniń áreketi saldarynan qarjy piramidasyna 160 mln teńgeden astam salymshy qarajaty tartylǵan.
Sonymen qatar sotqa deiingi tárkileý aiasynda kúdiktige tiesili, quny 221 mln teńge bolatyn jer telimi memleket kirisine alynǵan.
Buǵan deiin osy qylmystyq is boiynsha úsh adam sottalyp, olarǵa múlkin tárkileýmen birge alty jylǵa deiin bas bostandyǵynan aiyrý jazasy taǵaiyndalǵan.
Qazirgi ýaqytta tergeý jalǵasyp jatyr. QMA Qylmystyq-protsestik kodekstiń 201-babyna sáikes ózge aqparat jariia etilmeitinin málimdedi.
