بۇگىن ماڭعىستاۋ وبلىسىنىڭ اكىمى نۇرداۋلەت قيلىبايدىڭ توراعالىعىمەن مەملەكەت باسشىسى قاسىم-جومارت توقايەۆتىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى سيفرلىق وزگەرىستەر ارقىلى شەشۋ» اتتى قازاقستان حالقىنا جولداۋىندا ايتىلعان باستامالاردى تالقىلاۋعا ارنالعان وبلىس اكتيۆىنىڭ كەڭەيتىلگەن وتىرىسى ءوتتى.
جولداۋدا ەل ەكونوميكاسىن دامىتۋدىڭ جەتى نەگىزگى باعىتى ايقىندالدى. اتاپ ايتقاندا، ينۆەستيسيا تارتۋ، وڭدەۋ ونەركاسىبىن جانداندىرۋ، اۋىل شارۋاشىلىعىن جاڭا دەڭگەيگە كوتەرۋ، كولىك-لوگيستيكا سالاسىن جەتىلدىرۋ، ادامي كاپيتالدى كۇشەيتۋ، سيفرلىق دامۋ قارقىنىن ارتتىرۋ، تۇرعىن ۇي-كوممۋنالدىق شارۋاشىلىعى مەن سۋ ينفراقۇرىلىمىن جاڭعىرتۋ، سونداي-اق كاسپيي تەڭىزىن قۇتقارۋ ماسەلەلەرى قامتىلعان.
ايماق باسشىسى وسى باسىمدىقتار اياسىندا وڭىردە اتقارىلىپ جاتقان جانە الداعى جۇمىستارعا نازار اۋداردى.
ماڭعىستاۋ وبلىسىندا ينۆەستيسيا تارتۋ، بيزنەس-ورتانى جانە ينۆەستيسيالىق احۋالدى جاقسارتۋ بويىنشا بەلسەندى شارالار جۇرگىزىلۋدە. ناتيجەسىندە الداعى ۋاقىتتا ءىرى قىتايلىق كومپانيالارمەن جاسالعان كەلىسىمدەر اياسىندا كولىك جانە لوگيستيكا، ماشينا جاساۋ، سيفرلاندىرۋ جانە بالىق شارۋاشىلىعى سالالارىندا ينۆەستيسيالىق جوبالار ىسكە اسىرىلماق.
اكىم جولداۋدا اتاپ وتىلگەن كولىك-لوگيستيكا سالاسىن دامىتۋعا قاتىستى جوبالارعا دا توقتالدى. بۇگىندە مەملەكەت باسشىسىنىڭ قولداۋىمەن اقتاۋ پورتىندا كونتەينەرلىك حابتىڭ ءبىرىنشى كەزەڭى ىسكە قوسىلدى. ال 2028 جىلعا قاراي قۋاتى 11 ملن توننا بولاتىن «سارجا» تەڭىز تەرمينالى پايدالانۋعا بەرىلمەك. بۇدان بولەك اقتاۋ حالىقارالىق اۋەجايىندا قۇنى 1 ملرد اقش دوللارىن قۇرايتىن لوگيستيكالىق جانە اۆياسيالىق حابتىڭ قۇرىلىسى باستالادى.
سونىمەن قاتار ءوڭىر باسشىسى تۋريزم سالاسىنىڭ جولداۋداعى باسىم باعىتتاردىڭ ءبىرى ەكەنىن اتاپ ءوتتى. وسىعان وراي، 2025-2029 جىلدارى جالپى قۇنى 193 ملرد تەڭگەنى قۇرايتىن 19 جوبا جۇزەگە اسىرىلادى. بۇل قوسىمشا جاڭا جۇمىس ورىندارىن اشۋعا مۇمكىندىك بەرەدى. بوزجىرا، شەرقالا، ايراقتى، كەندىرلى جانە جىلى جاعاجاي تۋريستىك ايماقتارىندا ەكولوگيالىق جانە جاعاجاي ءتۋريزمىن دامىتۋعا باسىمدىق بەرىلۋدە.
وبلىس اكىمى جولداۋدا بەلگىلەنگەن مىندەتتەردى ءتيىمدى ورىنداۋ ءۇشىن ءماسليحات، اتقارۋشى بيلىك جانە ازاماتتىق قوعام اراسىنداعى ۇيلەسىمدى جۇمىستىڭ ماڭىزدىلىعىن اتاپ ءوتتى.
– مەملەكەت باسشىسى جولداۋدا ەل دامۋىنىڭ جاڭا باسىمدىقتارىن ايقىنداپ بەردى. ماڭعىستاۋ وبلىسى كولىك-لوگيستيكا سالاسىندا مەملەكەتتىڭ ەكونوميكاسى ءۇشىن ەرەكشە ماڭىزعا يە. مەملەكەت باسشىسى ءوز جولداۋىندا وسى سالانىڭ ماڭىزدىلىعىن اتاپ، دامىتۋ بويىنشا ءبىرقاتار تاپسىرما بەردى. سونىمەن قاتار بەينەۋ مەن سەكسەۋىل اراسىنداعى اۆتوجول قۇرىلىسىن اياقتاۋ تاپسىرىلدى. اتالعان باعىت ارقىلى جۇك تاسىمالىن وڭتايلاندىرۋعا جانە الماتى – بەينەۋ – سەكسەۋىل كولىك جەلىسىن دامىتۋعا مۇمكىندىك تۋادى. جوبانىڭ باستى ماقساتى – ەلىمىزدىڭ وڭتۇستىك جانە باتىس وڭىرلەرى اراسىنداعى بايلانىستى نىعايتۋ، ەكونوميكالىق ينتەگراسيانى قولداۋ. ءوڭىر الەۋەتىن ءتيىمدى پايدالانۋ – ءبىزدىڭ باستى مىندەتىمىز. ءقازىر ماقساتىمىز – حالىقپەن بىرگە وسى باستامالاردى جۇزەگە اسىرىپ، ايماقتىڭ تۇراقتى دامۋىنا قول جەتكىزۋ، – دەدى نۇرداۋلەت قيلىباي.
ماڭعىستاۋ وبلىسى اكىمىنىڭ باسپا ءسوز قىزمەتى
