داۋىس بەرۋگە ۇلتتىق كيىم كيىپ بارۋدى اۋىلدىڭ اق جاۋلىقتى انالارى كوتەرگەن. بۇل يدەيانى اۋىل جۇرتشىلىعى جىلى قابىلداپ، كوپشىلىكتەن قولداۋ تاپتى.
– قاراڭىزدارشى قانداي ادەمى، بارىنە جاراسىپ تۇر. اتا-بابالارىمىزدان مۇرا بولىپ جەتكەن اسىل قازىنالارىمىزدىڭ ءبىرى – ويۋ-ورنەكتى ۇلتتىق كيىم كيۋ – ەستەتيكالىق ءسان عانا ەمەس، حالقىمىزدىڭ مول تاعىلىمدى ۇلاعاتىن، ونەگەلى تالىم-تاربيەسىن، باي ۇلتتىق بولمىسىمىزدى ناسيحاتتاۋ بولىپ تابىلادى. وسىنى جاستاردىڭ ساناسىنا ءسىڭىرۋ عوي باستى ماقسات، – دەيدى اۋىلداعى اجەلەر كەڭەسىنىڭ ءتورايىمى اقكۇمىس دۇيسەنبايەۆا.
8 مىڭنان استام تۇرعىنى بار باياندى اۋىلىندا 4406 سايلاۋشى تىركەلگەن. ولار ورتا مەكتەپكە ورنالاسقان قوس سايلاۋ ۋچاسكەسىندە ءوز تاڭداۋلارىن جاساۋدا. سايلاۋ ۋچاسكەلەرىندە قازاقتىڭ كۇيلەرى كۇمبىرلەپ، تۇرعىنداردىڭ ۇلتتىق رۋحىن كوتەرە تۇسكەندەي.
– ۇلتتىق بولمىسىمىزدى ساقتاپ قالۋ – ۇلتتىق تاربيەدەن باستالادى عوي. وسىدان 1 اي بۇرىن اۋىل تۇرعىندارى بولىپ ىشىمدىكتەن باسى ءبۇتىن باس تارتتىق. اتقارۋشى بيلىك، قۇقىق قورعاۋ ورگاندارى مەن اۋىل كاسىپكەرلەرى وكىلدەرى الكوگول ونىمدەرىن ساتۋعا جانە ساتىپ الۋعا جول بەرمەۋ بويىنشا ءوزارا ىنتىماقتاستىق تۋرالى مەموراندۋمعا قول قويدىق. بۇل قادام قىلمىستىڭ ازايۋىنا كومەكتەسەدى دەپ ۇمىتتەنەمىز. ءقازىر اۋىل تىنىش. جاستار پايدالى ىستەرمەن اينالىسۋدا، – دەدى اۋىل اكىمى داستان مۇراتالييەۆ.
