Daýys berýge ulttyq kiim kiip barýdy aýyldyń aq jaýlyqty analary kótergen. Bul ideiany aýyl jurtshylyǵy jyly qabyldap, kópshilikten qoldaý tapty.
– Qarańyzdarshy qandai ádemi, bárine jarasyp tur. Ata-babalarymyzdan mura bolyp jetken asyl qazynalarymyzdyń biri – oiý-órnekti ulttyq kiim kiiý – estetikalyq sán ǵana emes, halqymyzdyń mol taǵylymdy ulaǵatyn, ónegeli tálim-tárbiesin, bai ulttyq bolmysymyzdy nasihattaý bolyp tabylady. Osyny jastardyń sanasyna sińirý ǵoi basty maqsat, – deidi aýyldaǵy ájeler keńesiniń tóraiymy Aqkúmis Dúisenbaeva.
8 myńnan astam turǵyny bar Baiandy aýylynda 4406 sailaýshy tirkelgen. Olar orta mektepke ornalasqan qos sailaý ýchaskesinde óz tańdaýlaryn jasaýda. Sailaý ýchaskelerinde qazaqtyń kúileri kúmbirlep, turǵyndardyń ulttyq rýhyn kótere túskendei.
– Ulttyq bolmysymyzdy saqtap qalý – ulttyq tárbieden bastalady ǵoi. Osydan 1 ai buryn aýyl turǵyndary bolyp ishimdikten basy bútin bas tarttyq. Atqarýshy bilik, quqyq qorǵaý organdary men aýyl kásipkerleri ókilderi alkogol ónimderin satýǵa jáne satyp alýǵa jol bermeý boiynsha ózara yntymaqtastyq týraly memorandýmǵa qol qoidyq. Bul qadam qylmystyń azaiýyna kómektesedi dep úmittenemiz. Qazir aýyl tynysh. Jastar paidaly istermen ainalysýda, – dedi aýyl ákimi Dastan Murataliev.
