پرەزيدەنتكە جاھاندىق گەوساياسي داعدارىس جاعدايىندا ۇلتتىق ەكونوميكانى دامىتۋ جونىندە ۇسىنىستار ەنگىزىلدى.
سونداي-اق مۇناي-گاز سەكتورىنىڭ عىلىمي-ينجينيرينگتىك الەۋەتىن كۇشەيتۋ ماسەلەلەرى قاراستىرىلدى.
بەلگىلى عالىم جانە قوعام قايراتكەرى جاقسىبەك قۇلەكەيەۆ قاسىم-جومارت توقايەۆقا ەلىمىزدىڭ الەۋمەتتىك-ەكونوميكالىق دامۋ پەرسپەكتيۆالارى تۋرالى ءوز كوزقاراسىن ايتتى.
سونىمەن قاتار جاڭا قازاقستان قۇرۋ اياسىندا مەملەكەتتىك قىزمەتشىلەر مەن ەكونوميكا سالاسىنداعى مامانداردى دايارلاۋ جانە قايتا دايارلاۋ پروبلەمالارى تالقىلاندى.
...
ءبىر كەزدەرى ەكونوميكا جانە ساۋدا مينيسترلىگىن باسقارعان جاقسىبەك قۇلەكەيەۆ ءمامين ۇكىمەتىن اشىق سىناعان ساراپشىلاردىڭ ءبىرى. قۇلەكەيەۆ كارانتين كەزىندە "ۇكىمەت داعدارىسقا بولىنگەن قىرۋار قاراجاتتى مۇلدە باسقا جاققا باعىتتاپ جىبەردى" دەپ مالىمدەگەن.
– توقايەۆ ەنگىزگەن توتەنشە جاعداي ساۋدا-ساتتىق سالاسى، اسحانالار، كافەلەر تۇتاستاي العاندا قىزمەت كورسەتۋ مەن ويىن-ساۋىق يندۋسترياسىنا دا اۋىر ءتيدى. ەكونوميكانىڭ شيكىزاتتىق ەمەس باعىتىندا بۇلاردىڭ ءرولى زور. شيكىزاتتىق ەمەس پورتفەلدىڭ تەڭ جارتىسى وسىلاردىڭ ۇلەسىندە.
ءمامين ۇكىمەتى داعدارىسقا بولىنگەن 300 ملرد-تى ەكونوميكانىڭ وسى سەكتورىنا ارناۋدىڭ ورنىنا، جول توسەۋ مەن باسپانا قۇرىلىسىنا باعىتتاپ جىبەردى. حالىقتى جۇمىسپەن قامتۋ ءۇشىن جول سالۋعا باسىمدىق بەرۋ - ەسكىرگەن ءادىس!
كوروناۆيرۋس پەن مۇناي باعاسىنىڭ قۇلدىراۋى سالدارىنان ەسەڭگىرەگەن ەكونوميكانى بۇلايشا ساۋىقتىرا المايسىڭ، – دەگەن بولاتىن قۇلەكەيەۆ.
ساراپشى باسپانا سالۋعا باعىتتالعان باعدارلامالار دا ەكونوميكانىڭ تامىرىنا قان جۇگىرتپەيتىنىن ايتقان.
"ۇلتتىق ۆاليۋتا قۇنسىزدانىپ، ەل كۇيزەلىسكە ۇشىراعان شاقتا قاس قىلعانداي باسپانا باعاسى دا شارىقتاي باستايدى. تابىسى تومەندەگەن حالىق قاي اقشاسىنا ءۇي الادى؟ ودان دا جۇرتقا، شاعىن ورتا بيزنەسكە كومەكتەسكەنى الدەقايدا قيسىندى بولار ەدى.
جالپى جۇرتتى جۇمىسپەن قامتۋدى كاسىپكەرلەرگە جۇكتەۋ كەرەك. ول ءۇشىن بيزنەستىڭ توبەسىنەن ءتونىپ تۇرعان بيۋروكراتيانىڭ كوزىن جويعان ءجون.
ءقازىر جۇرت مەدماسكا، انتيسەپتيك تاپپاي الاسۇرىپ ءجۇرمىز. ويلاپ قاراعان ادامعا تۇك قيىندىعى جوق. ماسكا ءوندىرىسىن ەل كولەمىندە جولعا قويۋعا ەكى-ۇش كۇن جەتكىلىكتى. انتيسەپتيكتىڭ الدەنەشە ءتۇرىن وندىرەتىن فابريكا قۇرۋعا قۇرىعاندا ءۇش كۇن كەتەدى. ماسەلە، ءبىزدىڭ ۇكىمەت كاسىپكەرلەرگە سەنبەيدى.
مەملەكەت قازىرگى شاقتا اۋاداي قاجەت وسى ءبىر ونىمدەردى سۋبسيديالاسا، كاسىپكەرلەر ءوز كەزەگىندە باعانى وسىرمەۋگە كەپىلدىك بەرسە، ازىرگىدەي الاساپىران تۋىنداماس ەدى، – دەگەن بولاتىن قۇلەكەيەۆ.
