Prezıdentke jahandyq geosaıası daǵdarys jaǵdaıynda ulttyq ekonomıkany damytý jóninde usynystar engizildi.
Sondaı-aq munaı-gaz sektorynyń ǵylymı-ınjınırıngtik áleýetin kúsheıtý máseleleri qarastyryldy.
Belgili ǵalym jáne qoǵam qaıratkeri Jaqsybek Qulekeev Qasym-Jomart Toqaevqa elimizdiń áleýmettik-ekonomıkalyq damý perspektıvalary týraly óz kózqarasyn aıtty.
Sonymen qatar Jańa Qazaqstan qurý aıasynda memlekettik qyzmetshiler men ekonomıka salasyndaǵy mamandardy daıarlaý jáne qaıta daıarlaý problemalary talqylandy.
...
Bir kezderi Ekonomıka jáne saýda mınıstrligin basqarǵan Jaqsybek Qulekeev Mámın úkimetin ashyq synaǵan sarapshylardyń biri. Qulekeev karantın kezinde "Úkimet daǵdarysqa bólingen qyrýar qarajatty múlde basqa jaqqa baǵyttap jiberdi" dep málimdegen.
– Toqaev engizgen tótenshe jaǵdaı saýda-sattyq salasy, ashanalar, kafeler tutastaı alǵanda qyzmet kórsetý men oıyn-saýyq ındýstrıasyna da aýyr tıdi. Ekonomıkanyń shıkizattyq emes baǵytynda bulardyń róli zor. Shıkizattyq emes portfeldiń teń jartysy osylardyń úlesinde.
Mámın úkimeti daǵdarysqa bólingen 300 mlrd-ty ekonomıkanyń osy sektoryna arnaýdyń ornyna, jol tóseý men baspana qurylysyna baǵyttap jiberdi. Halyqty jumyspen qamtý úshin jol salýǵa basymdyq berý - eskirgen ádis!
Koronavırýs pen munaı baǵasynyń quldyraýy saldarynan eseńgiregen ekonomıkany bulaısha saýyqtyra almaısyń, – degen bolatyn Qulekeev.
Sarapshy baspana salýǵa baǵyttalǵan baǵdarlamalar da ekonomıkanyń tamyryna qan júgirtpeıtinin aıtqan.
"Ulttyq valúta qunsyzdanyp, el kúızeliske ushyraǵan shaqta qas qylǵandaı baspana baǵasy da sharyqtaı bastaıdy. Tabysy tómendegen halyq qaı aqshasyna úı alady? Odan da jurtqa, shaǵyn orta bızneske kómekteskeni áldeqaıda qısyndy bolar edi.
Jalpy jurtty jumyspen qamtýdy kásipkerlerge júkteý kerek. Ol úshin bıznestiń tóbesinen tónip turǵan búrokratıanyń kózin joıǵan jón.
Qazir jurt medmaska, antıseptık tappaı alasuryp júrmiz. Oılap qaraǵan adamǵa túk qıyndyǵy joq. Maska óndirisin el kóleminde jolǵa qoıýǵa eki-úsh kún jetkilikti. Antıseptıktiń áldeneshe túrin óndiretin fabrıka qurýǵa quryǵanda úsh kún ketedi. Másele, bizdiń Úkimet kásipkerlerge senbeıdi.
Memleket qazirgi shaqta aýadaı qajet osy bir ónimderdi sýbsıdıalasa, kásipkerler óz kezeginde baǵany ósirmeýge kepildik berse, ázirgideı alasapyran týyndamas edi, – degen bolatyn Qulekeev.
