ماگنۋس كارلسەن بيبٸسارا اساۋباەۆامەن سوڭعى پارتيياعا شىقپاي, تەحنيكالىق جەڭٸلٸسكە ۇشىرادى

ماگنۋس كارلسەن بيبٸسارا اساۋباەۆامەن سوڭعى پارتيياعا شىقپاي, تەحنيكالىق جەڭٸلٸسكە ۇشىرادى
fide.com

شاحماتتان ەلەمنٸڭ بۇرىنعى چەمپيونى ماگنۋس كارلسەن (نورۆەگييا) ۆەنگرييادا ٶتٸپ جاتقان Total Chess World Championship Tour Pilot 2026 سۋپەرتۋرنيرٸنٸڭ پلەي-وفف كەزەڭٸندە بيبٸسارا اساۋباەۆاعا (قازاقستان) قارسى سوڭعى پارتيياعا قاتىسۋدان باس تارتتى, دەپ حابارلايدى dalanews.kz.

بليتس پەن راپيدتەگٸ جەڭٸستەردەن كەيٸن نورۆەگييالىق شاحماتشى 11,5:0,5 ەسەبٸمەن العا شىققان. وسىلايشا, ول ويىن كٷنٸنٸڭ قورىتىندىسى بويىنشا جەڭٸسٸن مەرزٸمٸنەن بۇرىن قامتاماسىز ەتتٸ. سوڭعى پارتييادا جەڭٸسكە 8 ۇپاي بەرٸلەتٸن ەدٸ. الايدا ماگنۋس كارلسەن ويىنعا كەلمەي, وعان تەحنيكالىق جەڭٸلٸس ەسەپتەلدٸ. سونىڭ نەتيجەسٸندە ماتچتىڭ قورىتىندى ەسەبٸ 11,5:8,5 بولدى.

TV 2 تەلەارناسىنا بەرگەن سۇحباتىندا كارلسەن سوڭعى كەزدەسۋدٸ «مٷلدەم ماعىناسىز» دەپ اتاپ, سول سەتتە ماتچتىڭ تاعدىرى شەشٸلٸپ قويعانىن ايتتى.

ساراپشىلاردىڭ پٸكٸرٸنشە, سوڭعى پارتييادا جەڭٸلٸس نەمەسە تەڭ نەتيجە تٸركەلگەن جاعدايدا كارلسەننٸڭ كلاسسيكالىق رەيتينگتەگٸ كٶرسەتكٸشٸ سوڭعى 17 جىلدا العاش رەت 2800 ۇپايدان تٶمەن تٷسۋٸ مٷمكٸن ەدٸ. الايدا تەحنيكالىق جەڭٸلٸس ونىڭ رەيتينگتٸك ۇپايلارىنا ەسەر ەتپەگەن.

بٷگٸن بۋداپەشتتە شاحماتشىلار اراسىنداعى ەكٸنشٸ ويىن كٷنٸ ٶتەدٸ. بۇل كەزدەسۋدە ەسەپ قايتادان نٶلدەن باستالادى. بيبٸسارا اساۋباەۆاعا جەڭٸس قاجەت. ەگەر وسىنداي نەتيجە تٸركەلسە, تۋرنيردٸڭ جەڭٸمپازى تاي-برەيكتەگٸ «ارماگەددون» پارتيياسىندا انىقتالادى.