ايتا كەتەلىك، بۇعان دەيىن "ادىرنا" پورتالىنا جاقيانوۆتىڭ ساياسات پەن بيزنەستەگى سەنىمدى سەرىگى تولەن توقتاسىنوۆ سۇحبات بەرىپ، ساياساتكەر قاتىستى ءبىرقاتار داۋلى مالىمەتپەن بولىسكەن.
جاقيانوۆ ءوز كەزەگىندە سۇحباتتاعى دەرەكتەر ويدان قۇرالعانىن ايتىپ، وزىنە نەگىزسىز ايىپ تاعىلدى دەپ ەسەپتەيدى.
"كوپتەگەن جىلدار بويى تولەن مەنىڭ دوسىم بولۋمەن قاتار، مەن ساياسي رەپرەسسياعا ۇشىراپ، باس بوستاندىعىمنان ايرىلعاندا ماعان وراسان زور كومەك كورسەتكەن سەرىكتەسىم بولدى.
دەگەنمەن، ءدال قازىرگى جاعدايدا مەن ءوز بەدەلىمدى سول ەرتەدەن كەلە جاتقان دوسىمنان قورعاۋعا ءماجبۇرمىن.
ەڭ الدىمەن، الماتى قالاسى مەدەۋ اۋداندىق سوتىندا توقتاسىنوۆقا قارسى كرەديتورلار قوزعاعان ازاماتتىق ىستە مەن تالاپكەر دە، جاۋاپكەر دە ەمەس ەكەنىمدى باسا ايتقىم كەلەدى. مەن بۇل پروسەستە باس قۇقىعى جانە جەكە مۇددەسى زارداپ شەككەن ءۇشىنشى تۇلعامىن"، – دەيدى ول.
ساياساتكەردىڭ ايتۋىنشا، اراداعى ارازدىققا اقشا سەبەپ بولعان. قارىزعا باتقان توقتاسىنوۆ موينىنداعى مىندەتتى كومپانياعا اۋدارعىسى كەلگەن.
"2007 جىلداردان باستاپ، توقتاسىنوۆ ءبىزدىڭ ورتاق تانىستارىمىزدان بىرنەشە رەت قوماقتى مولشەردە قارىزعا اقشا العان، ال مۇنىڭ ءبارى ماعان ءبىراز ۋاقىتتان سوڭ عانا بەلگىلى بولدى.
ۋاقىتىندا قايتارماعاننان نەمەسە قايتارعىسى كەلمەگەننەن بە، ول بارلىق جاۋاپكەرشىلىكتى اكسيونەرلەر كەلىسىمىن الماستان، ALGT ltd كومپانياسىنا اۋدارعىسى كەلدى.
2019 جىلى قارجىلىق مىندەتتەمە اينالاسىنداعى كيكىلجىڭنەن كەيىن توقتاسىنوۆتىڭ جوبادان شىعۋى جايلى ماسەلە قوزعالدى. كومپانيانىڭ ىشكى ءمان-جايى مەن قارىزدارى تۋرالى بەرىلگەن مالىمەت راستالعان جاعدايدا، ول الاتىن سوما الدىن الا انىقتالدى. سول سومانىڭ شامامەن ۇشتەن ءبىرىن ۋاقىتىندا الدى.
ءبىراق، كەلەسى تولەمدەر توقتاتىلدى. سەبەبى، الدىمەن ىشكى، كەيىن سىرتقى تاۋەلسىز اۋديت جاساپ تەكسەرۋ بارىسىندا (2022 جىلدىڭ ءبىرىنشى جارتىسىندا جاسالدى) توقتاسىنوۆ ەلەۋلى قارجىلىق بىلىقتار مەن الاياقتىق جاساعانى انىقتالدى"، – دەيدى ساياساتكەر.
جاقيانوۆتىڭ اتاپ وتكەنىندەي توقتاسىنوۆ "ءوزىنىڭ قارجىلىق مانيپۋلياسياسىنا ەشقانداي تۇسىنىكتەمە بەرمەگەن".
"مەنىڭ دە، وعان اقشا بەرگەندەردىڭ دە ماسەلەنى ءوزارا بەيبىت جولمەن شەشۋگە تىرىسقان ارەكەتىمىزدەن تۇك شىقپادى. ءتىپتى، قارىزدى قايتارا الاتىن مۇمكىندىگى بولا تۇرىپ، قايتارۋدان باس تارتتى.
تۋىنداعان سۇراقتارعا جاۋاپ بەرۋدىڭ ورنىنا، توقتاسىنوۆ ماعان شانتاج جاساپ، قورقىتا باستادى. مەنەن اقشا الماعان جاعدايدا، بۇقارالىق اقپارات قۇرالدارى ارقىلى مەنىڭ قوعامدىق بەدەلىمە نۇقسان كەلتىرەتىنىن اۋىزشا دا، جازباشا دا ايتا باستادى.
ماعان قارسى ارانداتۋدا قازاقستاندىق بيلىكتىڭ قولداۋىنا يە بولعانىن دا جەتكىزدى، ءبىراق مەن ونىڭ بوپسالاۋىن ۇزىلدى-كەسىلدى قابىلدامادىم. باس تارتتىم"، – دەيدى جاقيانوۆ.
ساياساتكەردىڭ اتاپ كورسەتكەنىندەي وسىنىڭ ناتيجەسىندە توقتاسىنوۆ جاقيانوۆقا قارسى موڭعوليانىڭ ساقشى ورىندارىنا ارىز بەرگەن. الايدا، قىلمىس قۇرامى جوق بولعاندىقتان ءىس اشىلماعان. كەرىسىنشە، توقتاسىنوۆتىڭ وزىنە قارسى قىلمىستىق ءىس قوزعالعان.
"بارلىق جاعداي مەن قۇجاتتاردى تەكسەرگەننەن كەيىن، كەرىسىنشە، موڭعوليانىڭ تەرگەۋ كوميتەتى مەن پروكۋراتۋراسى ALGT ltd بۇرىنعى اتقارۋشى ديرەكتور رەتىندە توقتاسىنوۆتىڭ ءوزىن الاياقتىق پەن قۇجاتتاردى قولدان جاساعانى ءۇشىن جاۋاپقا تارتۋعا شەشىم قابىلدادى.
ءوزى تاپسىرعان اقپارات جانە مەنىڭ ءوتىنىشىم نەگىزىندە موڭعوليا قىلمىستىق كودەكسىنىڭ 17.3-بابىنا سايكەس وعان وزىنە قارسى قىلمىستىق ءىس قوزعالدى.
تەرگەۋشىگە بەرگەن ۋادەسىنە قاراماستان جانە زاڭدى بۇزا وتىرىپ، توقتاسىنوۆ 2022 جىلعى 10 قازاندا موڭعوليادان كەتىپ قالدى، قازىرگى ۋاقىتتا وعان حالىقارالىق ىزدەۋ جاريالانعان.
جوعارىدا بەرىلگەن مالىمەت پەن بارلىق جاعداي مەدەۋ اۋداندىق سوتىنا ناقتى قۇجاتپەن ۇسىنىلعان.
قورىتىندىلاي كەلە مىنانى ايتقىم كەلەدى.
تولەن توقتاسىنوۆ ءوزىنىڭ جەكە باسىنداعى قارىزدارى مەن قارجىلىق بورىشتارىنان شاتاسىپ، جاۋاپكەرشىلىگىن مويىنداعىسى كەلمەي، مەنى اۋىر قىلمىس جاسادى دەپ ايىپتاپ، ماعان اشىق جالا جابۋعا كىرىستى. مۇنداي جالاسىنا كونەتىن نيەتىم جوق.
ماعان قارسى ۇيىمداستىرىلىپ جاتقان ارانداتۋلاردا توقتاسىنوۆتىڭ باستى ءرولدى ويناۋى ءوز شەشىمى مە، الدە بىرەۋلەردىڭ ايداپ سالۋى ما، ازىرشە انىق ايتا المايمىن. بارلىعى جاقىن ارادا اشكەرلەنەدى دەپ ويلايمىن جانە سوعان سەنەمىن. سونداي-اق، ءبىزدىڭ ىسكەرلىك جانە جەكە قارىم-قاتىناسىمىزدىڭ قوعامدىق تالقىلاۋدىڭ تاقىرىبىنا اينالعانىنا وكىنىش بىلدىرەمىن"، – دەيدى جاقيانوۆ.
