ۆلاديمير كيم مەن ەدۋارد وگايعا تيەسىلى Kazakhmys Copper كومپانياسى 2024 جىلدىڭ I توقسانىندا تازا تابىسىن بىلتىرعى وسى ۋاقىتپەن سالىستىرعاندا 2،5 ەسە ازايتقان. KASE قازاقستاندىق قور بيرجاسىنىڭ سايتىندا جاريالانعان ارالىق قارجى ەسەبىنە سۇيەنسەك، بيىلعى تازا تابىس مولشەرى — 25،6 ملرد تەڭگە. بىلتىر ول كورسەتكىش 64،7 ملرد تەڭگە بولعان ەدى.
2024 جىلدىڭ I توقسانىندا كومپانيانىڭ ساتىپ الۋشىلارمەن جاساسقان كەلىسىمشارتتارىنان تۇسكەن تابىسى 306 ملرد تەڭگە بولىپ وتىر. 2023 جىلدىڭ وسى كەزدەگى كورسەتكىشى 395 ملدر تەڭگە بولعان ەدى. وسى قاراجاتتىڭ باسىم بولىگى كاتودتى مىس (218 ملرد تەڭگە)، قۇيما التىن (36 ملرد تەڭگە) جانە تۇيىرشىك كۇمىس (17 ملرد تەڭگە) ساتقاننىڭ ەسەبىنەن تۇسكەن.
I توقسانداعى ونىمدەردىڭ نەگىزگى ساتىپ الۋشىلارى قاتارىندا جۇڭگو (125 ملرد تەڭگە، بىلتىر — 101 ملرد تەڭگە)، تۇركيا (92 ملرد تەڭگە، بىلتىر — 150 ملرد تەڭگە)، قازاقستان (62 ملرد تەڭگە، بىلتىر — 73 ملرد تەڭگە) مەن اقش (6،9 ملرد تەڭگە) بار. امەريكا قۇراما شتاتتارى نەگىزگى ساتىپ الۋشىلار قاتارىنان ۇلىبريتانيانى ىعىستىردى. 2023 جىلدىڭ I توقسانىندا ول 16 ملرد تەڭگەگە ءونىم ساتىپ العان ەدى.
ساتىلعان ءونىمنىڭ تازا قۇنى 211 ملرد تەڭگەنى قۇرادى، وسىلايشا كومپانياعا 94 ملرد تەڭگە كولەمىندە جالپى تابىس تۇسكەن. سالىق ۇستالعانعا دەيىنگى پايدا 36،5 ملرد تەڭگە بولدى. ءۇش اي ىشىندە كومپانيا 10،8 ملرد تەڭگە مولشەرىندە كورپوراتيۆتىك تابىس سالىعىن تولەدى. ال ءبىر جىل بۇرىنعىنىڭ كولەمى 16 ملرد تەڭگە بولعان.
