كرەمل ميگرانتتارعا قاتىستى جاڭا زاڭ قابىلداعالى تاجىكستاننان مازا كەتتى.
جاڭا جىلدان باستاپ رەسەيدە ەۋرازيا ەكونوميكالىق وداعىنا كىرمەيتىن ەلدەردەن كەلەتىن ميگرانتتارعا قاتىستى جاڭا زاڭ كۇشىنە ەندى. بۇل اسىرەسە وزبەكستان مەن تاجىكستاننىڭ ازاماتتارىنا اۋىر تيەدى: ولارعا ورىس ءتىلى مەن ورىس تاريحىنان ەمتيحان تاپسىرۋعا جانە جۇمىسقا ورنالاسۋ ءۇشىن بۇرىنعىدان بىرنەشە ەسەپ قىمبات پاتەنت ساتىپ الۋعا تۋرا كەلەدى.
تاجىكستاننان كەلەتىن ەڭبەك ميگرانتتارىنىڭ 72 پايىزى جۇمىستى رەسەي استاناسىنان ىزدەيدى.
ال بۇل تاجىكستان ەكونوميكاسىنا ۇلكەن سوققى. سىرتتا ەڭبەك ەتەتىن تاجىك ميگرانتتارىنىڭ ەلگە جىبەرەتىن تابىسى اتالعان ەلدىڭ ىشكى جالپى ءونىمىنىڭ (ءىجو) جارتىسىن قۇرايدى جانە تاجىكستاننىڭ ءبىر جىلدىق بيۋدجەتىنەن اسىپ تۇسەدى.
دەرەك بويىنشا، الەمنىڭ ءار تۇكپىرىندە ەڭبەك ەتەتىن (ونىڭ ىشىندە رەسەي دە بار) 6 ميلليون وزبەك ميگرانتى وتانىنا وزبەكستان ءىجو-سىنىڭ تورتتەن ءبىر بولىگىنە تەڭ كەلەتىن اقشا جىبەرەدى ەكەن. ال رەسەي فەدەرالدى كوشى-قون قىزمەتىنىڭ دەرەگىنشە، ەڭبەك ميگرانتتارىنا قاتىستى زاڭ قابىلدانعالى بەرگى ەكى اپتانىڭ ارالىعىندا ەلگە كىرگەن ازاماتتاردىڭ سانى 70 پايىزعا قىسقارعان. ساراپشىلاردىڭ پىكىرىنشە كرەمل وسى ارەكەتى ارقىلى ورتا ازيا ەلدەرىن ەۋرازيالىق وداققا كىرۋگە ماجبۇرلەۋدە.
پارۆيز مۋللودجانوۆ، تاجىك ساياساتتانۋشىسى:
كرەملدىڭ ينتەگراسيالىق جوباسىنا قاتىسقىسى كەلمەگەن ەلدەردى ماسكەۋ وسىلايشا «جازالاپ» جاتىر. بۇل رەسەيدىڭ بۇرىننان بەرگى پىسىقتاپ، ويلاستىرىپ جۇرگەن جوسپارى. ءتاجىستان پرەزيدەنتى ەمومالي راحمون تاجىك تەرريتورياسىنا اسكەر ورنالاستىرعانى ءۇشىن ماسكەۋدەن اقى تولەۋدى سۇراعاندا، رەسەيلىك ساياساتتانۋشىلار رەسەي اۋماعىنداعى تاجىك ميگرانتتارىن ەلدەن شىعارۋدى تالاپ ەتكەن بولاتىن. ال ەڭبەك ميگراسياسى ورتا ازياداعى تۇراقتىلىقتى قامتاماسىز ەتۋدە ەرەكشە ماڭىزعا يە.
2014 جىلى رەسەي ەلدە زاڭسىز جۇرگەن جانە اكىمشىلىك زاڭبۇزۋشىلىقتارعا بارعان 200 مىڭ تاجىك ازاماتىن وتانىنا جىبەرگەن.
ال رەسەيلىك رەسمي وكىلدەر ءوز سوزدەرىندە تاجىكستاننىڭ ەەو-عا كىرەتىنىن بىرنەشە رەت اڭعارتقان ەدى. رف حالىقارالىق ىستەر كوميتەتىنىڭ مۇشەسى يگور موروزوۆتىڭ پىكىرىنشە، تاجىكستان 2015 جىلدىڭ اياعىنا دەيىن ەۋرازيالىق وداققا ەنەدى.
كونستانتين پارشين،
اقش
