«قۇرمەتتى ەلوردا تۇرعىندارى مەن قوناقتارى! قالاداعى ەپيدەميولوگيالىق جاعداي ءالى دە كۇردەلى. وتكەن تاۋلىكتە مىڭنان استام ادامنان كوروناۆيرۋس ينفەكسياسى انىقتالدى. دارىگەرلەردىڭ ايتۋىنشا ناۋقاستاردىڭ وسۋىنە وتكەن دەمالىس كۇندەرى ايرىقشا اسەر ەتكەن.
ياعني قالا تۇرعىندارىنىڭ تابيعات اياسىندا ساۋىق قۇرىپ، سۋعا ءتۇسۋى ينفەكسيا جۇقتىرعانداردىڭ ارتۋىنا سەبەپ بولعان. قالا تۇرعىندارىن ادام كوپ جينالاتىن ورىندارعا بارماۋعا شاقىرامىن.
بوتەن ادامدارمەن، كوپشىلىكپەن قارىم-قاتىناسىن، سول سياقتى قوناققا بارۋىن توقتاتۋى قاجەت. ءقازىر الەۋمەتتىك جانە ازاماتتىق جاۋاپكەرشىلىك تانىتاتىن ۋاقىت. بۇل اسىرەسە بيزنەس نىساندارىنا دا قاتىستى. كوروناۆيرۋستىڭ جاڭا ءتۇرى – «دەلتا» شتاممى (ءۇندى دەپ تە اتالادى) نەعۇرلىم جۇقپالى، قىسقا ينكۋباسيالىق كەزەڭدە جۇرەتىنىن جانە اۋىر كۇيدە وتەتىنىن ەستە ۇستاعان ءجون»، - دەپ جازدى اكىم.
سونىمەن قاتار اكىم ينفەكسيا جۇقتىرعاندار سانىنىڭ ءوسۋىن، ونىڭ ىشىندە اۋىر حالدەگى ناۋقاستاردى ەسكەرە وتىرىپ، مەديسينالىق مەكەمەلەردى بىرىنەن سوڭ ءبىرىن كوۆيدتىك اۋرۋحانالارعا اينالدىرىپ جاتقانىن جەتكىزدى.
«مەديسينالىق مەكەمەلەردە 100 ۆاكسيناسيا پۋنكتى جۇمىس ىستەپ تۇر. قالا تۇرعىندارىنا ىڭعايلى بولۋ ءۇشىن ءبىرقاتار ساۋدا ءۇيى مەن سوو-دا ۆاكسيناسيا پۋنكتتەرى اشىلدى. بۇگىن ۆاكسيناسيا پۋنكتتەرىنىڭ بىرىنە باردىم. ۆاكسينا الۋ ءۇشىن بارلىق جاعداي جاسالعان. ال ەڭبەك ۇجىمدارىن ۆاكسيناسيالاۋ ءۇشىن مەديسينالىق بريگادالار اتتانادى.
الدىمىزدا وقۋ جىلى كەلە جاتىر. وقىتۋدىڭ بۇرىنعى فورماتىنا – وفلاين رەجيمگە ورالۋ ءۇشىن ۇجىمدىق يممۋنيتەتتى دامىتۋ قاجەت. ۇجىمدىق يممۋنيتەت وزگە دە كاسىپورىندارعا ۇزدىكسىز جۇمىس ىستەۋگە مۇمكىندىك بەرەدى.
قازىرگى ۋاقىتتا ۆاكسينانىڭ ءبىرىنشى كومپونەنتىن 300 مىڭنان استام قالا تۇرعىنى الدى. ۆاكسيناسيا — ءوزىڭىزدىڭ دەنساۋلىعىڭىزدى، سونداي-اق جاقىندارىڭىز بەن اينالاڭىزداعى ادامداردىڭ دەنساۋلىعىن قورعاۋدىڭ جالعىز ءادىسى. ءوزىڭىزدى جانە جاقىندارىڭىزدى قورعاڭىز!» — دەپ تولىقتىردى ەلوردا اكىمى.
