«Qurmetti elorda turǵyndary men qonaqtary! Qaladaǵy epidemiologiialyq jaǵdai áli de kúrdeli. Ótken táýlikte myńnan astam adamnan koronavirýs infektsiiasy anyqtaldy. Dárigerlerdiń aitýynsha naýqastardyń ósýine ótken demalys kúnderi airyqsha áser etken.
Iaǵni qala turǵyndarynyń tabiǵat aiasynda saýyq quryp, sýǵa túsýi infektsiia juqtyrǵandardyń artýyna sebep bolǵan. Qala turǵyndaryn adam kóp jinalatyn oryndarǵa barmaýǵa shaqyramyn.
Bóten adamdarmen, kópshilikpen qarym-qatynasyn, sol siiaqty qonaqqa barýyn toqtatýy qajet. Qazir áleýmettik jáne azamattyq jaýapkershilik tanytatyn ýaqyt. Bul ásirese biznes nysandaryna da qatysty. Koronavirýstyń jańa túri – «Delta» shtammy (úndi dep te atalady) neǵurlym juqpaly, qysqa inkýbatsiialyq kezeńde júretinin jáne aýyr kúide ótetinin este ustaǵan jón», - dep jazdy ákim.
Sonymen qatar ákim infektsiia juqtyrǵandar sanynyń ósýin, onyń ishinde aýyr haldegi naýqastardy eskere otyryp, meditsinalyq mekemelerdi birinen soń birin kovidtik aýrýhanalarǵa ainaldyryp jatqanyn jetkizdi.
«Meditsinalyq mekemelerde 100 vaktsinatsiia pýnkti jumys istep tur. Qala turǵyndaryna yńǵaily bolý úshin birqatar saýda úii men SOO-da vaktsinatsiia pýnktteri ashyldy. Búgin vaktsinatsiia pýnktteriniń birine bardym. Vaktsina alý úshin barlyq jaǵdai jasalǵan. Al eńbek ujymdaryn vaktsinatsiialaý úshin meditsinalyq brigadalar attanady.
Aldymyzda oqý jyly kele jatyr. Oqytýdyń burynǵy formatyna – oflain rejimge oralý úshin ujymdyq immýnitetti damytý qajet. Ujymdyq immýnitet ózge de kásiporyndarǵa úzdiksiz jumys isteýge múmkindik beredi.
Qazirgi ýaqytta vaktsinanyń birinshi komponentin 300 myńnan astam qala turǵyny aldy. Vaktsinatsiia — ózińizdiń densaýlyǵyńyzdy, sondai-aq jaqyndaryńyz ben ainalańyzdaǵy adamdardyń densaýlyǵyn qorǵaýdyń jalǵyz ádisi. Ózińizdi jáne jaqyndaryńyzdy qorǵańyz!» — dep tolyqtyrdy elorda ákimi.
