"سامۇرىق-ەنەرگو" مەملەكەتتىك كومپانياسى ەكى اكتيۆتى بالانسىنان شىعاردى: ءشۇلبى مەن  وسكەمەن گەس-تەرىن. وسىنداي اقپاراتتى كومپانيا KASE سايتىنا ورنالاستىردى، دەپ حابارلايدى Dalanews.kz.

وسى سيپاتتاعى مامىلەلەر 21-22 اقپاندا جاسالعانى دا ناقتىلانادى. بۇعان دەيىن "سامۇرىق-ەنەرگو" گەس-تەردىڭ ءارقايسىسىنىڭ 100% ۇلەسىنە يە بولعان. اكتيۆتەر كىمگە جانە قانداي باعامەن ساتىلعان، ازىرگە بەلگىسىز.

ايتا كەتسەك،  "سامۇرىق-ەنەرگو" 2024 جىلدىڭ كوكتەمىندە "سامۇرىق-قازىنا" مەملەكەتتىك حولدينگىنەن ەكى گەس-تى ساتىپ العان بولاتىن. "ءشۇلبى گەس-ى" ج ش س 36،2 ملرد تەڭگەگە، ال "وسكەمەن گەس-ى" ج ش س 23،5 ملرد تەڭگەگە ساتىپ الىندى. ساۋدا-ساتتىق نارىقتىق باعاعا ساي جۇرگىزىلدى. ال قوس نىساندى ساتىپ الۋ قور بيرجاسىنا "سامۇرىق-ەنەرگونىڭ" ورنالاستىرعان اكسيالارى ەسەبىنەن جۇرگىزىلدى. 2024 جىلدىڭ ءساۋىر ايىندا "سامۇرىق-ەنەرگو" KASE-گە 96،4 مىڭ تەڭگەنىڭ 375،5 مىڭ قاراپايىم اكسياسىن جانە 90،4 مىڭ تەڭگەنىڭ 260 مىڭ اكسياسىن شىعاردى. قوسىمشا ەميسسيانىڭ جالپى كولەمى 59،7 ملرد تەڭگەنى قۇرادى. "سامۇرىق-ەنەرگو" وسى اكسيالارمەن 100 پايىز ۇلەستى ساتىپ الۋدا تولەم جاسادى.

ال 2021 جىلى ۇكىمەت "ءشۇلبى گەس-ى" ج ش س مەن "وسكەمەن گەس-ى" جشس-لارداعى 100% مەملەكەتتىك ۇلەستى ءابۋ-دابي جانە قازاقستان ينۆەستورلار كونسورسيۋمىنا تىكەلەي اتاۋلى ساتۋدى جوسپارلاعان. بۇل تۋرالى "اشىق نقا" سايتىندا جاريالانعان زاڭ جوباسىندا قامتىلدى. 2022 جىلى بۇل قۇجات كەرى قايتارىپ الىندى.

ءشۇلبى گەس-ى - سەمەي قالاسىنان 70 شاقىرىم جەردە ورنالاسقان ەرتىس كاسكادىنداعى ءۇشىنشى ستانسيا. ول جوبالىق قۋاتى (702 مۆت) بويىنشا قازاقستانداعى ەڭ ءىرى نىسان بولىپ تابىلادى. گەس 1987 جىلى ىسكە قوسىلدى.  

وسكەمەن گەس-ى - ەرتىس گەس كاسكادىنىڭ ەكىنشى ساتىسى جانە بۇقتىرما گەس كونتررەتتەگىشىنىڭ ءرولىن اتقارادى. ول 1952 جىلى پايدالانۋعا بەرىلدى. ونىڭ بەلگىلەنگەن (جوبالىق) قۋاتى - 367،8 مۆت، ال ناقتىسىندا 335 مۆت-تى قۇرايدى. قوس نىسان "سامۇرىق-قازىنا" ءۇاق-عا تيەسىلى بولعانعا دەيىن ق ر ەنەرگەتيكا مينيسترلىگىنىڭ مەنشىگىندە بولعان.

 "سامۇرىق-ەنەرگو" اق - بۇل "سامۇرىق-قازىنا" مەملەكەتتىك حولدينگىنىڭ قۇرىلىمىنا كىرەتىن ءىرى كوپسالالى ەلەكتر ەنەرگەتيكالىق حولدينگ. ونىڭ قىزمەتى ەنەرگيامەن جابدىقتاۋ جۇيەسىن قالىپتاستىرۋعا باعىتتالعان.  

نەگىزىنەن، 2025 جىلى مەملەكەت باسشىسىنىڭ تاپسىرماسى بويىنشا 40-تان استام اۋديتورلىق ءىس-شارا وتكىزۋ جوسپارلانعان. سونىڭ ىشىندە "سامۇرىق-قازىنا" قورىنا جانە وعان كىرەتىن ۇلتتىق كومپانيالار بيۋدجەتى دە تەكسەرىلەتىن بولادى.