كەلەس اۋدانى ءبىلىم بولىمىنە قاراستى №2 ءو.جانىبەكوۆ اتىنداعى مەكتەپ-گيمنازياسىنىڭ 11-سىنىپ وقۋشىسى ابۋباكىر ارمان ۇلى شەتەلدىك جوعارى وقۋ ورىندارىنان بىرنەشە حالىقارالىق ءبىلىم گرانتىنا يە بولىپ، ۇلكەن جەتىستىككە قول جەتكىزدى، – دەپ حابارلايدى Dalanews.kz 

جاس تالاپكەر فرانسيا، يتاليا، ليتۆا جانە مالايزيا ەلدەرىندەگى بەدەلدى جوعارى وقۋ ورىندارىنان شاقىرتۋ الدى.

اتاپ ايتقاندا، ول John Cabot University (يتاليا، ريم) ۋنيۆەرسيتەتىنەن 50% وقۋ گرانتىنا، American University of Paris (فرانسيا) ۋنيۆەرسيتەتىنەن 70% وقۋ گرانتىنا، LCC International University (ليتۆا) وقۋ ورنىنان جارتىلاي وقۋ گرانتىنا، سونداي-اق Xiamen University Malaysia ۋنيۆەرسيتەتىنەن 4 جىلدىق تولىق وقۋ گرانتىنا شاقىرتۋ العان.

"بۇل شاكىرتتىڭ بىرنەشە جىلدىق ەڭبەگى مەن جۇيەلى دايىندىق جۇمىستارىنىڭ ناتيجەسى. جەتىستىككە جەتۋ جولىندا اتا-اناسىنىڭ قولداۋى مەن ۇستازدارىنىڭ ەڭبەگى مەن تالىم-تاربيەسى ۇلكەن ءرول اتقارعانى ءسوزسىز. اسىرەسە، اعىلشىن ءتىلى ءپانىنىڭ ءمۇعالىمى ءارى سىنىپ جەتەكشىسى ۇلىقبەك بەردالييەۆتىڭ كاسىبي قولداۋى ەرەكشە اتاپ وتۋگە تۇرارلىق"، - دەلىنگەن حابارلامادا.

قازىرگى تاڭدا ابۋباكىر ارمان ۇلى تۇركيا ۇكىمەتىنىڭ Türkiye Bursları حالىقارالىق شاكىرتاقى باعدارلاماسى، بولگارياداعى American University in Bulgaria، سونداي-اق وڭتۇستىك كورەيا ۋنيۆەرسيتەتتەرىنەن دە وڭ ناتيجە كۇتۋدە.