مۇعالىمدەر ءبىلىم جانە عىلىم ءمينيسترى اسحات ايماعامبەتوۆكە جولداعان اشىق حاتتا كاسىپوداق فەدەراسياسى قۇرامىنداعى "قازاقستانداعى سالالىق ءبىلىم جانە عىلىم كاسىپوداعى" ۇيىمىنا اي سايىن جالاقىسىنان جىرىپ، جارنا تولەيتىنىن، ءبىراق "ۇستاز قۇقىعىن قورعاۋى ءتيىس كاسىپوداق ءوز مىندەتىن اتقارمايتىنىن" جازعان.

"كاسىپوداق جارعىسى بويىنشا، كاسىپوداق مۇعالىمدەردىڭ قۇقىعىن قورعايتىن ۇيىم بولۋى ءتيىستى. سول ءۇشىن مۇعالىمدەر اي سايىن كاسىپوداققا جارنا تولەپ كەلەدى. ءبىراق وكىنىشكە قاراي، ءمۇعالىم قۇقىعىن قورعاعان كاسىپوداق كورمەدىك.

ءمۇعالىم مەكتەپكە جۇمىسقا كىرگەندە كاسىپوداققا قوسا كىرۋگە مىندەتتى بولادى. بۇل ءبىلىم مەكەمەلەرىندەگى جازىلماعان زاڭ بولىپ قالىپتاسقان.

ياعني، جۇمىستان جالاقى العان مۇعالىمنەن كەلىسىم سۇراماستان مەكتەپ ەسەپشىلەرى كاسىپوداققا جارنا ۇستاي باستايدى. ءمۇعالىم كاسىپوداق قۇرامىنا كىرگەنىن دە بىلمەيدى" دەپ جازىلعان اشىق حاتتا.

مينيسترگە اشىق حات جازعان مۇعالىمدەر "اتامەكەن" كاسىپكەرلەر پالاتاسى (جەكە مەنشىك مەكتەپ يەلەرىنىڭ مۇددەسىن قورعايدى) – ءبىلىم جانە عىلىم مينيسترلىگى – كاسىپوداق اراسىنداعى ءۇش جاقتى كەلىسىمشارتتى بۇزۋدى، مەكتەپكە جۇمىسقا تۇرعان مۇعالىمدەردى اۆتوماتتى تۇردە كاسىپوداق مۇشەسى قىلۋدى، كاسىپوداق جارناسىن مەكتەپ ەسەپشىسى ارقىلى تولەۋدى توقتاۋدى تالاپ ەتكەن.

مەكتەپ قىزمەتكەرلەرى جارنانى ەسەپشى ارقىلى جيناۋدىڭ جانە ءمۇعالىمدى اۆتوماتتى تۇردە كاسىپوداققا كىرگىزۋدىڭ ارتىندا كۇدىكتى ارەكەت تۇر دەپ بىلەدى.

"قازاقستانداعى سالالىق ءبىلىم جانە عىلىم كاسىپوداعى" ۇيىمىنىڭ جەتەكشىسى ايگۇل مۇقاشيەۆا باستاماشىل توپ ماسەلەنى "ورىنسىز" قوزعاپ وتىر دەپ سانايدى. سوزىنشە، كاسىپوداقتىڭ ءاربىر مۇشەسى ۇيىمعا ءوز ءوتىنىشى بويىنشا عانا قابىلدانادى.

- ول ادامداردىڭ كەلىسىمىنسىز ەسەپشى ولاردىڭ جالاقىسىنان ۇستاپ، جارنا اۋدارا المايدى. مۇمكىن، كەي جەرلەردە ونداي جەتىسپەۋشىلىك بار شىعار. ءبىراق ءبىز ءوز تاراپىمىزدان ونداي جەتىسپەۋشىلىكتى كورسەك، بىردەن قولعا الامىز. جانە كاسىپوداققا ەشكىمدى ماجبۇرلەپ كىرگىزبەيمىز. ال مۇعالىمدەردىڭ قۇقىعىن قورعاۋدان ەشقاشان باس تارتقان جوقپىز، - دەدى ول.

ايگۇل مۇقاشيەۆانىڭ سوزىنشە، ەڭبەك كودەكسىنە ساي ءۇش جاقتى جاسالعان كەلىسىمدى ءبىلىم جانە عىلىم مينيسترلىگىنىڭ ءبىر جاقتى بۇزۋعا حاقى جوق. ءوزارا كەلىسىممەن عانا بۇزىلادى.

2018 جىلى حالىقارالىق كاسىپوداقتار كونگرەسى (حكك) قازاقستان كاسىپوداقتار فەدەراسياسىنىڭ مۇشەلىگىن توقتاتىپ، "بيلىك ورگاندارى باسقاراتىن جانە دەموكراتيا مەن حكك جارعىسىنداعى ۇستانىمداردى ەلەمەيتىن ۇيىمعا قاتارىمىزدا ورىن جوق" دەپ مالىمدەگەن.