Qazaqstandyq myńnan astam muǵalim kásipodaqqa jarna tóleýden bas tartatynyn aityp, bilim jáne ǵylym ministri Ashat Aimaǵambetovke ashyq hat jazdy. Ustazdar "jarna tólesek de, kásipodaq quqyǵymyzdy qorǵamaidy" deidi.
Muǵalimder bilim jáne ǵylym ministri Ashat Aimaǵambetovke joldaǵan ashyq hatta Kásipodaq federatsiiasy quramyndaǵy "Qazaqstandaǵy salalyq bilim jáne ǵylym kásipodaǵy" uiymyna ai saiyn jalaqysynan jyryp, jarna tóleitinin, biraq "ustaz quqyǵyn qorǵaýy tiis kásipodaq óz mindetin atqarmaitynyn" jazǵan.
"Kásipodaq jarǵysy boiynsha, kásipodaq muǵalimderdiń quqyǵyn qorǵaityn uiym bolýy tiisti. Sol úshin muǵalimder ai saiyn kásipodaqqa jarna tólep keledi. Biraq ókinishke qarai, muǵalim quqyǵyn qorǵaǵan kásipodaq kórmedik.
Muǵalim mektepke jumysqa kirgende kásipodaqqa qosa kirýge mindetti bolady. Bul bilim mekemelerindegi jazylmaǵan zań bolyp qalyptasqan.
Iaǵni, jumystan jalaqy alǵan muǵalimnen kelisim suramastan mektep esepshileri kásipodaqqa jarna ustai bastaidy. Muǵalim kásipodaq quramyna kirgenin de bilmeidi" dep jazylǵan ashyq hatta.
Ministrge ashyq hat jazǵan muǵalimder "Atameken" kásipkerler palatasy (jeke menshik mektep ieleriniń múddesin qorǵaidy) – Bilim jáne ǵylym ministrligi – kásipodaq arasyndaǵy úsh jaqty kelisimshartty buzýdy, mektepke jumysqa turǵan muǵalimderdi avtomatty túrde kásipodaq múshesi qylýdy, kásipodaq jarnasyn mektep esepshisi arqyly tóleýdi toqtaýdy talap etken.
Mektep qyzmetkerleri jarnany esepshi arqyly jinaýdyń jáne muǵalimdi avtomatty túrde kásipodaqqa kirgizýdiń artynda kúdikti áreket tur dep biledi.
"Qazaqstandaǵy salalyq bilim jáne ǵylym kásipodaǵy" uiymynyń jetekshisi Aigúl Muqasheva bastamashyl top máseleni "orynsyz" qozǵap otyr dep sanaidy. Sózinshe, kásipodaqtyń árbir múshesi uiymǵa óz ótinishi boiynsha ǵana qabyldanady.
- Ol adamdardyń kelisiminsiz esepshi olardyń jalaqysynan ustap, jarna aýdara almaidy. Múmkin, kei jerlerde ondai jetispeýshilik bar shyǵar. Biraq biz óz tarapymyzdan ondai jetispeýshilikti kórsek, birden qolǵa alamyz. Jáne kásipodaqqa eshkimdi májbúrlep kirgizbeimiz. Al muǵalimderdiń quqyǵyn qorǵaýdan eshqashan bas tartqan joqpyz, - dedi ol.
Aigúl Muqashevanyń sózinshe, Eńbek kodeksine sai úsh jaqty jasalǵan kelisimdi Bilim jáne ǵylym ministrliginiń bir jaqty buzýǵa haqy joq. Ózara kelisimmen ǵana buzylady.
2018 jyly Halyqaralyq kásipodaqtar kongresi (HKK) Qazaqstan kásipodaqtar federatsiiasynyń músheligin toqtatyp, "bilik organdary basqaratyn jáne demokratiia men HKK jarǵysyndaǵy ustanymdardy elemeitin uiymǵa qatarymyzda oryn joq" dep málimdegen.
