الماتى قالاسىنىڭ "الماتى باس جوسپارى" الاڭىندا كاسىپكەرلەرمەن بيزنەستى قورعاۋ ماسەلەسى بويىنشا كەزدەسۋ ءوتتى. ءىس-شاراعا الماتى قالاسى اكىمىنىڭ ورىنباسارى الىشەر ءابدىقادىروۆ، ق ر سىبايلاس جەمقورلىققا قارسى ءىس-قيمىل اگەنتتىگىنىڭ پريەۆەنسيا قىزمەتىنىڭ باسشىسى سايان احمەتجانوۆ، مەملەكەتتىك ورگانداردىڭ باسشىلارى جانە ءتۇرلى قىزمەت سالالارى بويىنشا بيزنەس وكىلدەرى قاتىستى.
الىشەر ءابدىقادىروۆتىڭ ايتۋىنشا، سىبايلاس جەمقورلىق كورىنىستەرىنە "مۇلدەم توزبەۋشىلىكتى" قالىپتاستىرۋ بويىنشا بىرلەسكەن كۇش-جىگەر قاجەت.
"مەملەكەت باسشىسىنىڭ تاپسىرماسى اياسىندا بۇگىندە زاڭعا باعىناتىن، باسەكەگە قابىلەتتى بيزنەستى سىبايلاس جەمقورلىق كورىنىستەرىنەن قورعاۋ بويىنشا جان-جاقتى شارالار قابىلداۋ قاجەت. ءاربىر مەملەكەتتىك قىزمەتشى سىبايلاس جەمقورلىق پەن پاراقورلىق ءۇشىن نەگىزدى جويۋ بويىنشا قادامدار جاساۋى ءتيىس"، - دەپ اتاپ ءوتتى الماتى اكىمىنىڭ ورىنباسارى الىشەر ءابدىقادىروۆ.
ءوز كەزەگىندە، پريەۆەنسيا قىزمەتىنىڭ باسشىسى سايان احمەتجانوۆ سىبايلاس جەمقورلىققا قارسى كۇرەس مەملەكەتتىك ساياساتتىڭ ستراتەگيالىق باسىمدىعى ەكەنىن ايتىپ، قالانىڭ بيزنەس احۋالىن جاقسارتۋ ماقساتىندا ودان ءارى تابىستى ىنتىماقتاستىققا ءۇمىت ءبىلدىردى.
كەزدەسۋ سوڭىندا كاسىپكەرلەردىڭ پروبلەمالىق ماسەلەلەرى تالقىلاندى، مەملەكەتتىك ورگانداردىڭ وكىلدەرىنە اكىمشىلىك كەدەرگىلەردى جويۋ جانە مەملەكەتتىك قىزمەتشىلەر اراسىندا سىبايلاس جەمقورلىق فاكتىلەرىنە جول بەرمەۋ بويىنشا ءبىرقاتار تاپسىرمالار بەرىلدى.
كەڭەسكە قاتىسۋشىلار بيزنەس-قوعامداستىقتىڭ بارلىق ايتىلعان يدەيالارى مەن ۇسىنىستارى ەسكەرىلەتىنىن اتاپ ءوتتى.
