بەلگلى كاسىپكەر باۋىرجان وسپانوۆ اۋىلىنا مەشىت سالىپ، سول مەشىتكە نۇر-مۇباراكتى بىتىرگەن جاس ءدىن قىزمەتكەرىن بۇكىل جاعدايىن جاساپ ورنالاستىردى.

بىردە اۋىل اقساقالدارى اقىلداسا كەلىپ، اۋىلدان اراقتى الىپ تاستايىق دەپ ۇسىنىس ايتىپتى. بۇنى الماتىدا جاتىپ ەستىگەن باۋكەڭ، يمامعا اۋىلدا نەشە ءۇي اراق ساتادى، قانشا اقشا تابادى، سونى ءبىل دەپ تاپسىرما بەرەدى.

سويتسە، وتىز شاقتى ءۇي اراق ساتىپ، اي سايىن 200-300 مىڭ پايدا تاۋىپ وتىرعانى بەلگىلى بولادى. باۋكەڭ، سول اقشانى ول كىسىلەرگە مەن بەرەيىن، اراق ساتپاي-اق قويۋعا كەلىسسە دەپتى.

سودان نە كەرەك، ءبارى اراقتى الىپ تاستايدى. ودان دا قىزىعى، ءبىرازدان كەيىن كاسىپكەردىڭ اقشاسىن الۋدان باس تارتا باستاعان. نە بولدى دەپ سۇراسا، اراق ساتۋدى قويعان ءبىر كىسى، "اراق ساتۋدى دوعارعاننان كەيىن ۇيىمىزگە بەرەكە كىردى، كوشەدە كورىنگەنمەن توبەلەسىپ جۇرگەن بالام جۇمىسقا تۇردى، قايتىپ كەلىپ وتىرعان قىزىم ءوز جۇبىن تاپتى، كۇيەۋىم نامازعا جىعىلىپ، نەمەرەلەرىن ەرتىپ قۋانىپ ءجۇر، ەندى وسىنىڭ ءبارىن وسى اقشا ءۇشىن عانا ىستەگەن بولمايىقشى، نيەتىمىزگە كەسىرى تيمەسىن دەپ الىپ كەلدىم" دەپتى. باسقالارى دا سوعان ۇقساس جاۋاپ ايتقان.

كەيىن باۋكەڭ اۋىلعا كەلىپ، ءبارىن قالاي تەز كوندىردىڭ دەپ مولدادان سۇراپتى. سوندا جاس جىگىت جىميىپ

"وعان ءبىزدىڭ ارەكەت قانا ەمەس ءسىزدىڭ قارجىڭىز دا ۇلكەن ۇلەسىن قوستى. مەن ول دۇكەندەرگە بارعاندا، ءومىر بار جەردە ءولىم بار، سورەسىندە اراق تولى ۇيدەن بىرەۋ قايتىس بولا قالسا، ماعان حابارلاسپاڭىزدار، كورشى اۋىلدان اكەلەسىزدەر ما، الدە باسقا جولمەن شەشەسىزدەر مە، مەن جانازا وقۋعا كەلمەۋىم مۇمكىن دەپ كەتتىم، يمانى بويىنان تارقاماعان الاقانداي اۋىل ءۇشىن اقتىق ساپارعا ابىرويسىز اتتانۋدان وتكەن قورلىق جوق قوي، بىردەن كەلىسىپ، ورتاق مامىلەگە تەز كەلدى" دەپتى.

سودان كەيىن، "مەن دە ءسال قورقىتىڭقىراپ ايتقانىم عوي، ايتپەسە جانازاعا بارماي قويمايمىن عوي" دەپ كۇلەتىن كورىنەدى.

قازىرگى تاڭدا باۋكەڭنىڭ اۋىلى تاۋلى جەر بولعاندىقتان حالىقتىڭ كوبى ارا ۇستاپ، كاسىپ ەتەدى. سولار ءۇشىن باۋكەڭ اۋىلعا ۇلكەن قالالارداعى ستاندارتتارعا ساي كەلەتىن سەح قويىپ بەرگەن، ياعني ءۇيىڭنىڭ الدىندا وتىرىپ ءونىمىڭدى قىمبات باعامەن وتكىزۋگە مۇمكىندىك بار. ال ول تابيعي بال ونىمدەرى رەسپۋبليكامىزدىڭ تۇكىپىر-تۇكپىرىندە، شەت ەلدەردە ۇلكەن سۋپەرماركەتتەردە ءتۇرلى-تۇستى قوراپتارمەن ساتىلىپ جاتىر.

بۇكىل حالىقتى كاسىپپەن، جۇمىسپەن قامتاماسىز ەتىپ، ءتورت تۇلىگىن تۇگەندەپ اتا كاسىپتى جاڭا جاھاندىق ۇلگىدە دامىتىپ، اۋىل ىرگەسىندەگى ورماندى قالپىنا كەلتىرىپ، ول جەردە بۇرىن مەكەندەپ ءقازىر جويىلىپ كەتكەن اڭ-قۇستارىنا دەيىن تۇگەندەپ، لەپسى اۋىلىنا ۇلكەن سپورت كەشەنىن سالىپ، سوسىن كەيبىر وبلىس ورتالىقتارىندا جوق زاماناۋي، ينتەلەكتۋالدىق فيزيكا مەن ماتەماتيكانى تەرەڭدەتىپ وقىتاتىن مەكتەپ اشىپ، كوپكە پانا، جۇرتقا قامقور بولىپ وتىرعان اعامىز بارىمىزگە ۇلگى.

ارداقتى اقساقالىمىز، وليمپيادا چەمپيونى جاقسىلىق ۇشكەمپىروۆ ءبىر سۇحباتىندا، قازاقتىڭ بەس مىڭ اۋىلىن كوتەرىپ، جولعا سالىپ جىبەرەتىن بەس مىڭ جىگىت بولسا، شىركىن، دەپ، ۇلتقا ۇران تاستاعانداي ءسوز ايتىپ ەدى. ەل امان، جۇرت تىنىش بولسا، ول كۇن دە كەلەر، سول كەزدە سول كوشتىڭ باسىندا باۋىرجان وسپانوۆتاردىڭ تۇراتىنى داۋسىز. اعامىزدىڭ كاسىبىنە مەرەكە، قوس دۇنيەسىنە جاقسىلىق تىلەيمىز!