Birde aýyl aqsaqaldary aqyldasa kelip, aýyldan araqty alyp tastaiyq dep usynys aitypty. Buny Almatyda jatyp estigen Báýkeń, imamǵa aýylda neshe úi araq satady, qansha aqsha tabady, sony bil dep tapsyrma beredi.
Sóitse, otyz shaqty úi araq satyp, ai saiyn 200-300 myń paida taýyp otyrǵany belgili bolady. Báýkeń, sol aqshany ol kisilerge men bereiin, araq satpai-aq qoiýǵa kelisse depti.
Sodan ne kerek, bári araqty alyp tastaidy. Odan da qyzyǵy, birazdan keiin kásipkerdiń aqshasyn alýdan bas tarta bastaǵan. Ne boldy dep surasa, araq satýdy qoiǵan bir kisi, "araq satýdy doǵarǵannan keiin úiimizge bereke kirdi, kóshede kóringenmen tóbelesip júrgen balam jumysqa turdy, qaityp kelip otyrǵan qyzym óz jubyn tapty, kúieýim namazǵa jyǵylyp, nemerelerin ertip qýanyp júr, endi osynyń bárin osy aqsha úshin ǵana istegen bolmaiyqshy, nietimizge kesiri timesin dep alyp keldim" depti. Basqalary da soǵan uqsas jaýap aitqan.
Keiin Báýkeń aýylǵa kelip, bárin qalai tez kóndirdiń dep moldadan surapty. Sonda jas jigit jymiyp
"Oǵan bizdiń áreket qana emes sizdiń qarjyńyz da úlken úlesin qosty. Men ol dúkenderge barǵanda, ómir bar jerde ólim bar, sóresinde araq toly úiden bireý qaitys bola qalsa, maǵan habarlaspańyzdar, kórshi aýyldan ákelesizder ma, álde basqa jolmen sheshesizder me, men janaza oqýǵa kelmeýim múmkin dep kettim, imany boiynan tarqamaǵan alaqandai aýyl úshin aqtyq saparǵa abyroisyz attanýdan ótken qorlyq joq qoi, birden kelisip, ortaq mámilege tez keldi" depti.
Sodan keiin, "Men de sál qorqytyńqyrap aitqanym ǵoi, áitpese janazaǵa barmai qoimaimyn ǵoi" dep kúletin kórinedi.
Qazirgi tańda Báýkeńniń aýyly taýly jer bolǵandyqtan halyqtyń kóbi ara ustap, kásip etedi. Solar úshin Báýkeń aýylǵa úlken qalalardaǵy standarttarǵa sai keletin tseh qoiyp bergen, iaǵni úiińniń aldynda otyryp ónimińdi qymbat baǵamen ótkizýge múmkindik bar. Al ol tabiǵi bal ónimderi respýblikamyzdyń túkipir-túkpirinde, shet elderde úlken sýpermarketterde túrli-tústi qoraptarmen satylyp jatyr.
Búkil halyqty kásippen, jumyspen qamtamasyz etip, tórt túligin túgendep ata kásipti jańa jahandyq úlgide damytyp, aýyl irgesindegi ormandy qalpyna keltirip, ol jerde buryn mekendep qazir joiylyp ketken ań-qustaryna deiin túgendep, Lepsi aýylyna úlken sport keshenin salyp, sosyn keibir oblys ortalyqtarynda joq zamanaýi, intelektýaldyq fizika men matematikany tereńdetip oqytatyn mektep ashyp, kópke pana, jurtqa qamqor bolyp otyrǵan aǵamyz bárimizge úlgi.
Ardaqty aqsaqalymyz, olimpiada chempiony Jaqsylyq Úshkempirov bir suhbatynda, qazaqtyń bes myń aýylyn kóterip, jolǵa salyp jiberetin bes myń jigit bolsa, shirkin, dep, ultqa uran tastaǵandai sóz aityp edi. El aman, jurt tynysh bolsa, ol kún de keler, sol kezde sol kóshtiń basynda Baýyrjan Ospanovtardyń turatyny daýsyz. Aǵamyzdyń kásibine mereke, qos dúniesine jaqsylyq tileimiz!
