Memleket basshysy AQSh Prezidentiniń Ońtústik jáne Ortalyq Aziia boiynsha arnaiy ókili Serdjio Gordy qabyldady, dep habarlaidy dalanews.kz.
Prezident Qasym-Jomart Toqaev qazaq-amerika yntymaqtastyǵynyń joǵary deńgeiin atap ótip, Amerika Qurama Shtattarymen keńeitilgen strategiialyq seriktestikti odan ári nyǵaitýǵa beiil ekenin rastady.
"Biz ózekti máselelerdi keńinen talqylaýǵa múmkindik týǵanyn oń baǵalaimyz. Ásirese, asa mańyzdy mineraldar boiynsha C5+1 dialogyna qatysýyńyzdy quptaimyz. Bul Qurama Shtattardyń Qazaqstanmen jáne búkil Ortalyq Aziiamen yntymaqtastyqqa strategiialyq turǵydan mán beretinin kórsetedi. Sondai-aq Sizdiń ekijaqty bailanystardy damytýǵa qosqan úlesińizdi atap ótkim keledi. Qazaqstan Amerika Qurama Shtattarymen keńeitilgen strategiialyq seriktestikti odan ári arttyrýǵa múddeli. Oraily sátti paidalana otyryp, Siz arqyly AQSh Prezidenti Donald Trampqa ystyq yqylasym men izgi tilegimdi joldaimyn. Jyl sońyna qarai biz kezdesemiz dep oilaimyn. Sonymen birge Maiamide ótetin G20 sammitine qatysýǵa shaqyrǵany úshin rizashylyǵymdy bildiremin", – dedi Memleket basshysy.
Serdjio Gor Qasym-Jomart Toqaevqa kezdesý úshin alǵys aityp, Prezident Donald Tramptyń sálemin jetkizdi.
"Sizdiń Aq úide dosyńyz bar dep senimmen aita alamyn. Prezident Tramp qyzmetińizdi airyqsha baǵalaidy. Biz elderimizdiń múddesi úshin ózara tiimdi sheshimder izdeýge umtylamyz. Muny AQSh pen aimaq elderi arasyndaǵy qarym-qatynastyń qarqyny dáleldeidi. Keiingi jyldyń ózinde 20 milliard dollardan asa somaǵa kelisim jasaldy. Bul áli bastaýy ǵana ekenine senimdimin. Sizdiń jyl sońynda ótetin G20 sammitine qatysatynyńyzǵa óte qýanyshtymyz", – dedi Arnaiy ókil.
Qasym-Jomart Toqaev pen Serdjio Gor birlesken saýda-ekonomikalyq jáne investitsiialyq jobalardy júzege asyrý, sondai-aq asa mańyzdy mineraldar, kólik-logistika, tsifrlandyrý men basqa da basym salalardaǵy yqpaldastyq perspektivasyn talqylady. Qazaqstan teń quryltaishylarynyń biri bolǵan Beibitshilik keńesiniń qyzmetine erekshe nazar aýdaryldy.
Memleket basshysynyń málimdeýinshe, elimiz halyqaralyq turaqtylyq pen gýmanitarlyq bastamalardy ilgeriletý isine úles qosýǵa daiyn. Sondai-aq óńirlik jáne jahandyq kún tártibindegi ózekti máseleler jóninde pikir almasý ótti.
Kezdesý sońynda Prezident pen Arnaiy ókil san qyrly qazaq-amerika yntymaqtastyǵyn tereńdetýge ózara múddeli ekenin qýattady.
