اۋىل اقساقالدارى جانە جاستارمەن كەڭەسىپ، مۇلدەم تاس توسەلمەگەن ويدىم-ويدىمى شىققان توپىراق كوشەلەرگە تاس-قۇم توسەتىلدى. شوعان ابىز ەسكەرتكىشىنىڭ باتىس جاعىنداعى تاس جولدىڭ جيەگىندەگى سوناۋ 60-جىلداردىڭ اياعىنداعى سۋ تاسقىنى سالدارىنان بولعان ۇلكەن شۇڭقىرلارعا دا تاس-قۇم تولتىرىلدى.
اۋىلدىڭ ءبىرتۋار ازاماتى مەديسينا عىلىمىنىڭ دوكتورى راحمەت جارتىبايەۆتىڭ دەمەۋشىلىگىمەن بارلىق كوشە اتاۋلارىنىڭ تاقتايشالارى (انشلاگتار) تالاپقا ساي جاڭارتىلىپ، قايتادان ورناتىلدى. ناتيجەسىندە اۋىل كوشەلەرىنىڭ كەلبەتى ايتارلىقتاي جاقساردى.
كەڭەس زامانىنان بەرى قاراۋسىز قالعان اۋماعى 4 گەكتاردى قۇرايتىن اۋىل پاركى ورالبەك باستاعان اۋىل ازاماتتارىنىڭ ارقاسىندا تۇتاستاي قورشالىپ، كوشە جاعىنداعى تەمىر قورشاۋلارى تۇزەتىلىپ، جۇمىسپەن قامتۋ باعدارلاماسىمەن تارتىلعان اۋىلدىڭ قىز-كەلىنشەكتەرىنىڭ كۇشىمەن بىركەلكى تۇسپەن سىرلانىپ، قايتادان قالپىنا كەلتىرىلدى. پارك ىشىندەگى قۋراعان اعاشتارعا بيىل سانيتارلىق تازالىق جۇمىستارى جۇرگىزىلۋدە، ال كەلەسى جىلى كوكتەمدە جاسىل جەلەكتەر وتىرعىزىلماقشى.
اۋىلدىق وكرۋگ اكىمدىگى عيماراتىنىڭ توزىعى جەتكەن شاتىرى مەن 149 مەتر قورشاۋى دا جاڭارتىلعانىن ايتا كەتۋىمىز كەرەك. كوشە بويىنداعى قيسايعان قورشاۋلار قايتا قالپىنا كەلتىرىلىپ، بىركەلكى تۇسپەن سىرلاندى.
اۋىل ارىقتار تراكتورمەن قايتا قازىلىپ، اۋىل تۇرعىندارى باس ارىققا سۋدىڭ ەرتە تۇسۋىنە بايلانىستى شابىندىق جانە ەگىستىك جەرلەرىن سۋعارىپ، ءشوپ شابۋ ناۋقانىن باستاپ تا كەتتى.
اۋىل كەلبەتىنىڭ وزگەرۋى ءبىر عانا اكىمدىكتىڭ موينىنا ارتىپ قوياتىن شارۋا ەمەس. بۇل كوپ بولىپ بىتەتىن شارۋا. اۋىلدىڭ اجارىن كىرگىزىپ، كوركەيتۋ ءاربىر ازاماتتىڭ ازماتتىق بورىشىنا اينالىۋ ءتيىس.
