كورمەگە كورشىلەس ەلدەگى 230-عا جۋىق كاسىپورىننىڭ ونىمدەرى قويىلىپ، تاماق ونەركاسىبى، قۇرىلىس، ماشينا جاساۋ، مەتاللۋرگيا، حيميا، جەڭىل ونەركاسىپ، فارماسيەۆتيكا، جيھاز، كيىم جانە توقىما سالاسىنا قاتىستى، سونىمەن قاتار، كادەسىيلار مەن سپورتتىق تاۋارلار جانە ويىنشىقتار سىندى 1 مىڭنان استام ءونىم وڭتۇستىكقازاقستاندىقتارعا ۇسىنىلدى.
اتالعان ءىس-شارا اياسىندا وبلىس اكىمى جانسەيىت تۇيمەبايەۆ تاشكەنت قالاسى اكىمىنىڭ ءبىرىنشى ورىنباسارى نوزيم حۋسانوۆ باستاعان دەلەگاسيامەن كەزدەستى. وندا اكىم وزبەكستان كاسىپكەرلەرىمەن وڭتۇستىك قازاقستان وبلىسىنىڭ اۋماعىندا ءبىر مىڭنان استام ياعني، ساۋدا، ونەركاسىپ، اۋىل شارۋاشىلىعى، قۇرىلىس پەن قۇرىلىس ماتەريالدارىن ءوندىرۋ، مەديسينا جانە ءبىلىم بەرۋ سالالارىندا تابىستى ىنتىماقتاستىق ورناتىلعانىن اتاپ ءوتتى.
− ءبىزدىڭ ايماق بيزنەستى دامىتۋ ءۇشىن ينۆەستورلارعا قولايلى جاعداي جاساۋ الەۋەتىمەن ەرەكشەلەنەدى. 2010 جىلى شىمكەنت قالاسىندا توقىما ونەركاسىبىن دامىتۋ ماقساتىندا «وڭتۇستىك» ارنايى ەكونوميكالىق ايماعى قۇرىلعان. سونىمەن قاتار، وبلىسىمىزداعى 11 يندۋستريالدى ايماقتا كاسىپكەرلەر ءۇشىن قولايلى جاعداي جاسالعان. بۇگىنگى كەزدەسۋ شىمكەنت پەن تاشكەنت كاسىپكەرلەرىنىڭ اراسىندا بولاشاق جەمىستى ىنتىماقتاستىقتىڭ نەگىزى بولادى دەپ ۇمىتتەنەمىن، − دەدى اكىم.
ءوز كەزەگىندە، تاشكەنت قالاسى اكىمىنىڭ ءبىرىنشى ورىنباسارى نوزيم حۋسانوۆ جىلى قابىلداۋ ءۇشىن العىسىن ءبىلدىرىپ، باۋىرلاس ەلدەردىڭ ساۋدا-ەكونوميكالىق ىنتىماقتاستىعىنان بولەك، مادەني-گۋمانيتارلىق بايلانىسىنىڭ نىعايا تۇسەتىنىنە سەنىم ءبىلدىردى.
− بۇگىن ءبىز 900-گە جۋىق تاۋار ءتۇرىن نازارلارىڭىزعا ۇسىناتىن بولامىز. دەگەنمەن، بۇل ءبىزدىڭ بارلىق الەۋەتىمىز دەگەندى بىلدىرمەيدى. الداعى باسقوسۋلارىمىزدا دا تابىستى جەتىستىكتەرگە بىرگە جەتەمىز دەگەن ۇمىتتەمىن. جالپى، قازاقستان مەن تاشكەنت اراسىنداعى ساۋدا اينالىمى جىلدان-جىلعا ارتىپ كەلەدى. ماسەلەن، بىلتىر قازاقستاننىڭ تاشكەنتپەن اراداعى ساۋدا اينالىمى 500 ملن. اقش دوللارى بولسا، بيىلعى جىلدىڭ ءبىرىنشى توقسانىنداعى ناتيجە بويىنشا اتالعان سوما 150 ملن. اقش دوللارىنا كوبەيىپ وتىر، − دەدى ن.حۋسانوۆ.
مۇنان سوڭ، ايماق باسشىسى تاشكەنت قالاسى تاۋاروندىرۋشىلەرىنىڭ كورمەسىنە قاتىسىپ، ونداعى ونىمدەرىمەن تانىستى. سونىمەن قاتار، وزبەكستاندىق كاسىپكەرلەردى بىرلەسە جۇمىس ىستەۋگە شاقىردى.
«جالپى، قازىرگى تاڭدا ەكى ەلدىڭ اراسىنداعى ساۋدا-ەكونوميكالىق قاتىناستىڭ جاندانۋى بايقالۋدا. ياعني، 2016 جىلدىڭ قورىتىندىسى بويىنشا وزبەكستانمەن سىرتقى تاۋار اينالىمىنىڭ كولەمى 1،5 ملرد. اقش دوللارىن قۇراپ، ونىڭ 30%-دان استامى وڭتۇستىك قازاقستان وبلىسىنا (532،4 ملن.اقش دولل.) تيەسىلى بولىپ وتىر. الايدا، قوس مەملەكەتتىڭ پرەزيدەنتتەرىنىڭ – ن.نازاربايەۆ پەن ش.ميرزيەيەۆتىڭ ءوزارا كەزدەسۋلەرى، ياعني، وزبەك باسشىسىنىڭ ەلباسىمەن 22-23 ناۋرىزدا قازاقستاندا كەزدەسۋى، 29 ساۋىردەگى وڭتۇستىك قازاقستاندا جۇزدەسۋىنىڭ ناتيجەسىندە ساۋدا اينالىم كولەمىن 5 ملرد. اقش دوللارىنا جەتكىزۋ تۋرالى ۋاعدالاستىعىن ەسكەرسەك، بۇل بىزدەر ءۇشىن از سوما دەپ بىلەمىن. سوندىقتان، باۋىرلاس ەلدەر بولاشاقتا بۇل سالالارداعى بايلانىسىن ودان ءارى نىعايتىپ، مادەني-گۋمانيتارلىق ىنتىماقتاستىعىن ودان ءارى كۇشەيتەدى دەپ بىلەمىن»، − دەدى اكىم.
بۇگىندە قازاقستاننان وزبەكستانعا باعىتتالعان ەكسپورتتىڭ باسىم بولىگى مۇناي جانە ونىڭ ونىمدەرى مەن ۇن-جارما ونەركاسىبىنىڭ ونىمدەرى، استىق، قارا جانە ءتۇستى مەتالل، سەمەنت، ترانسفورماتورلار، ورگانيكالىق ەمەس حيميا جانە ازىق-تۇلىك ونىمدەرى بولىپ تابىلادى. ال وزبەكستاننان قازاقستانعا جەمىس-جيدەك، كوكونىس ونىمدەرى، ماقتا تالشىعى، توقىما جانە دايىن تىگىن ونىمدەرى، تىڭايتقىشتار، مەحانيكالىق قۇرىلعىلار، پلاستماسسا بۇيىمدارى، اعاش جانە گيپس، ماتالى ەمەس ماتەريالدار مەن ماتالار يمپورتتالۋدا.
وقو اكىمىنىڭ باسپا ءسوز قىزمەتى
