جاقىندا حۆق-نىڭ جۇرگىزگەن زەرتتەۋى جاريالانعان بولاتىن. وندا قازاقستان 2025 جىلى جان باسىنا شاققانداعى دوللارداي ءجىو كورسەتكىشى بويىنشا رەسەيدى باسىپ وزعانى ايتىلادى. وسىعان قاتىستى رەسەيلىك ميللياردەر ولەگ دەريپاسكا پىكىر ءبىلدىردى، دەپ حابارلايدى Dalanews.kz.
2022 جىلدان بەرى باتىستىڭ سانكسيالار تىزىمىنە ىلىنگەن رەسەيلىك كاسىپكەر مۇنداي تۇجىرىمدى ەل "كۇتپەگەن حابارعا" جاتقىزبايدى. بۇل تۋرالى ول ءوزىنىڭ Telegram ارناسىندا جازدى.
كاسىپكەر ولەگ دەريپاسكا حۆق دەرەكتەرىنە تۇسىنىكتەمە بەرە وتىرىپ، بۇل اراداعى "ءوسىمنىڭ نەگىزگى فاكتورلارىنىڭ ستاندارتتى جيىنتىعىن" اتاپ ءوتتى. ولاردىڭ ىشىندە: مەنشىك قۇقىعىن قورعاۋ، شەتەلدىك ينۆەستورلاردى تارتۋ، زاڭنىڭ ۇستەمدىگى جانە سىبايلاس جەمقورلىق دەڭگەيىنىڭ تومەندەۋى، سونداي-اق جۇيەلى مەملەكەتتىك سەكتوردىڭ ۇلەسىن قىسقارتۋ.
"ماڭىزدىسى، بۇل ايقىن شارالار جيىنتىعى شىنىمەن دە جۇمىس ىستەپ تۇر، وعان كەپىلدىك بەرە الامىن. ال قىتايمەن سەنىمدى لوگيستيكالىق دالىزدەردى قۇرۋ، ەلەۋسىز قالۋى مۇمكىن ەمەس تۇراقتى ناتيجە بەرۋدە"، دەپ جەلىدە جازعان ول قازاقستان بويىنشا ستاتيستيكا شىنايى ەكەنىن اتاپ ءوتتى.
ايتا كەتەيىك، حالىقارالىق ۆاليۋتا قورىنىڭ بولجامىنا سايكەس، 2025 جىلدىڭ قورىتىندىسى بويىنشا جان باسىنا شاققانداعى قازاقستاننىڭ دوللارداي ءجىو كورسەتكىشى 14،77 مىڭ دوللاردى، ال رەسەيدىكى 14،26 مىڭ دوللاردى قۇرايدى. قوردىڭ مالىمەتىنشە، 2024 جىلى رەسەيدە بۇل كورسەتكىش 4،6% -عا جوعارى بولعان. ءبىراق 2025 جىلى رەسەيدىڭ جان باسىنا شاققانداعى دوللارداي ءجىو كورسەتكىشى 3،6% - عا كۇرت قىسقارۋى مۇمكىن.
بۇعان دەيىن سايتىمىزدا بۇل رەتتە "ءجىو كورسەتكىشى بويىنشا قازاقستان رەسەي مەن قىتايدى باسىپ وزدى. ساراپشىلار نە دەيدى؟" دەگەن ماقالا جاريالانعان بولاتىن.
