بۇل باعىتتا قابىلدانعان مەملەكەتتىك باعدارلامالار مەن جان-جاقتى قولداۋلار جەكە كاسىپپەن شۇعىلدانامىن، كاسىبىمدى كەڭەيتەمىن دەۋشىلەرگە مول مۇمكىندىكتەردى قاراستىرعان.
وسى ورايدا جەتىساي اۋدانىنىڭ اكىمى سەرىك مامىتوۆ اسىقاتا كەنتىندەگى «بەگالى» جەكە كاسىپكەرلىگىندە بولدى.
2021 جىلدىڭ تامىزىندا ىسكە قوسىلعان نىسان بۇگىندە تاۋلىگىنە 2 مىڭ دانا كىر سابىن مەن كىر جۋۋ ۇنتاعىنىڭ قۇرعاق جانە سۇيىق تۇرلەرىنەن 1 تونناعا جۋىق ءونىم وندىرەدى.
وندىرىلگەن ونىمدەردى جەتىساي، ماقتاارال، سارىاعاش اۋداندارىمەن قاتار شىمكەنت، الماتى، تۇركىستان جانە اقتاۋ قالالارىنا تاپسىرىس بويىنشا جونەلتىپ وتىرادى. جەرگىلىكتى 4 تۇرعىن تۇراقتى جۇمىسپەن قامتىلعان.
شيكىزاتتى شەت ەلدەن تاسىمالدايتىن شاعىن سەح باسشىسى باۋىرجان ماحانوۆ الداعى ۋاقىتتا ءتىس پاستاسى مەن سۋسابىن، كىر جۋعىشتاردىڭ بىرنەشە ءتۇرىن شىعارىپ، كاسىپورىننىڭ قۋاتتىلىعىن ارتتىرۋعا نيەتتى. ول ءۇشىن مەملەكەتتەن قولداۋ، جەڭىلدەتىلگەن نەسيە كەرەك.
– قازىرگى ۋاقىتتا كەز-كەلگەن ازاماتتىڭ كاسىپ اشىپ، تىرلىگىن باستاۋىنا، كاسىبىنىڭ اۋقىمىن كەڭەيتۋىنە مۇمكىندىگى زور. بۇگىنگىدەي نارىق زامانىندا تىنىمسىز ەڭبەك قانا جوعارى تابىسقا باستايتىنى انىق. ەلىمىزدەگى ءتۇرلى مەملەكەتتىك باعدارلامالار كاسىبىن جاڭادان باستايتىن جانە كولەمىن ارتتىراتىن تۇرعىنداردى جەتىستىككە جەتەلەيتىنىن كورسەتىپ وتىر. ەڭ باستىسى – مەملەكەت تاراپىنان ۇسىنىلعان قولداۋلاردى ءمۇلت جىبەرمەي، جەڭىلدەتىلگەن نەسيەلەردى ورىندى پايدالانا ءبىلۋ كەرەك. كاسىپكەرلەرگە قولداۋ كورسەتىلەدى، – دەدى اۋدان باسشىسى.
