سولاردىڭ ءبىرى – جەتىساي اۋدانى قىزىلقۇم اۋىلىنىڭ تۇرعىنى، تەمىر ۇستاسى ءامىر اۋەلبەكوۆ. جاستايىنان تەمىر-تەرسەك قۇراستىرۋعا قۇمار ول بۇگىندە جۇرتتىڭ اجەتىنە جاراپ، شاعىن ۇستاحانالىق سەح اشىپ، ەلدىڭ العىسىن الىپ ءجۇر.
جۋىردا عانا ول ءبىر عاسىرعا جۋىق «عۇمىر كەشكەن» كوك تراكتورعا «جان ءبىتىرىپ»، اۋىلدىڭ كىرەبەرىسىنە ەسكەرتكىش رەتىندە تارتۋ ەتپەك نيەتتە ەكەن. 1922 جىلى شىققان تراكتوردىڭ ماركاسى – «ۋنيۆەرسال». بۇل تراكتوردى سوڭعى جىلدارى قوسقۇدىق اۋىلىنىڭ تۇرعىنى قىرعىزباي بوتى ۇلى ەسىمدى ازامات تىزگىندەپتى. قىرعىزباي اقساقال و، دۇنيەلىك بولىپ كەتكەننەن سوڭ بالالارى «اكەمىزدىڭ كوزى» دەپ ەشكىمگە ساتپاي ساقتاپتى. ءتىپتى ءبىر كەزدەرى بۇل تراكتوردىڭ ايىرباسىنا – سۋ جاڭا «جيگۋلي» دە ۇسىنعان ەكەن. الايدا اكە اماماناتىنا ادال بالالارى ايىرباسقا بارماپتى.
«كوك تراكتوردىڭ ءبىراز بولشەگىن قايتا قالپىنا كەلتىرۋگە تۋرا كەلدى. بىرنەشە بولشەكتى قولدان قۇراستىردىم. سىرلاپ، جاڭادان دوڭگەلەك سالدىم. ەندى بىرەر كۇندە قايتا قۇرىلىمداۋ جۇمىستارىن اياقتاپ، اۋىل اكىمشىلىگىنىڭ باسشىلارىنا تابىستايمىن»، — دەيدى ءامىر اۋەلبەكوۆ.
بۇگىندە ءامىردىڭ شاعىن سەحىندا 4 جىگىت جۇمىس ىستەيدى. ولار تەمىر قاقپالار قۇراستىرىپ، اركا، باستىرما جاساۋدىڭ ناعىز شەبەرلەرى اتانىپ ۇلگەرگەن. ماۋسىمدىق كەزەڭدەگى تابىسىمىز ايىنا 250-300 مىڭ تەڭگەگە دەيىن ۇلعايادى دەيدى ولار. ءىستىڭ كوزىن تاپقان ءامىر الداعى جىلى ءۇيىنىڭ ىرگەسىنەن جىل ون ەكى اي جۇمىس ىستەۋگە لايىقتى شاعىن سەح سالۋدى جوسپارلاپ وتىر.
