قازاقستاندىق ۆولەيبولشى سابينا التىنبەكوۆا الەۋمەتتىك جەلىدەگى پاراقشاسىندا Orda.kz (Orda sport) رەداكسياسىنا رەسمي تالاپ قويعانىن مالىمدەدى. سپورتشىنىڭ ايتۋىنشا، اتالعان مەديا ونىڭ جەكە ومىرىنە قاتىستى مالىمەتتەردى رۇقساتسىز تاراتىپ، ماتەريالدارىندا ونى بىرنەشە رەت “اجىراسقان” دەپ كورسەتكەن، دەپ حابارلايدى Dalanews.kz.
التىنبەكوۆا بۇل اقپاراتتى تاراتۋعا كەلىسىم بەرمەگەنىن اتاپ ءوتتى. ونىڭ پىكىرىنشە، مۇنداي جاريالانىمدار ادامنىڭ ار-نامىسى مەن قادىر-قاسيەتىنە ءتيىپ، جەكە ءومىرى تۋرالى مالىمەتتەردى رۇقساتسىز تاراتۋ بولىپ سانالادى. سپورتشى اتالعان ءىس بويىنشا قازاقستان رەسپۋبليكاسىنىڭ زاڭناماسىنا، سونىڭ ىشىندە “بۇقارالىق اقپارات قۇرالدارى تۋرالى” زاڭعا سۇيەنەتىنىن مالىمدەدى.
وسىعان بايلانىستى ول رەداكسياعا ءبىرقاتار تالاپ قويدى.
“جەكە ومىرىمە قاتىستى مالىمەتتەردى ماتەريالدارىڭىزدان الىپ تاستاۋدى نەمەسە تۇزەتۋدى، 7 كۇن ىشىندە رەسمي كەشىرىم جاريالاۋدى نە اقپاراتتى جوققا شىعارۋدى جانە تالاپتارىمنىڭ ورىندالعانى تۋرالى ماعان جازباشا تۇردە حابارلاۋدى سۇرايمىن”، - دەپ جازدى ول.
ەگەر بۇل تالاپتار بەلگىلەنگەن مەرزىمدە ورىندالماسا، سپورتشى ءوز قۇقىقتارىن قورعاۋ ءۇشىن سوتقا جۇگىنەتىنىن جانە مورالدىق شىعىن ءوندىرۋ ماسەلەسىن كوتەرەتىنىن ەسكەرتتى.
سونىمەن قاتار ول قوعامدا “اجىراسقان” دەگەن ءسوزدىڭ ادامعا تاڭبا رەتىندە تاعىلۋىنا قارسى ەكەنىن ايتتى. ونىڭ پىكىرىنشە، اجىراسۋ - ءومىردىڭ ءبىر كەزەڭى عانا، ال ادامنىڭ قۇندىلىعى ونىڭ مارتەبەسىمەن ولشەنبەيدى. سپورتشى ءوزىن ەڭ الدىمەن ايەل، انا جانە كاسىبي مامان رەتىندە سيپاتتاپ، قازاقستاندىق ايەلدەردى ءوز ءومىرىن وزدەرى تاڭداۋعا شاقىردى.
