Qazaqstandyq voleibolshy Sabina Altynbekova áleýmettik jelidegi paraqshasynda Orda.kz (Orda sport) redaktsiiasyna resmi talap qoiǵanyn málimdedi. Sportshynyń aitýynsha, atalǵan media onyń jeke ómirine qatysty málimetterdi ruqsatsyz taratyp, materialdarynda ony birneshe ret “ajyrasqan” dep kórsetken, dep habarlaidy Dalanews.kz.
Altynbekova bul aqparatty taratýǵa kelisim bermegenin atap ótti. Onyń pikirinshe, mundai jariialanymdar adamnyń ar-namysy men qadir-qasietine tiip, jeke ómiri týraly málimetterdi ruqsatsyz taratý bolyp sanalady. Sportshy atalǵan is boiynsha Qazaqstan Respýblikasynyń zańnamasyna, sonyń ishinde “Buqaralyq aqparat quraldary týraly” zańǵa súienetinin málimdedi.
Osyǵan bailanysty ol redaktsiiaǵa birqatar talap qoidy.
“Jeke ómirime qatysty málimetterdi materialdaryńyzdan alyp tastaýdy nemese túzetýdi, 7 kún ishinde resmi keshirim jariialaýdy ne aqparatty joqqa shyǵarýdy jáne talaptarymnyń oryndalǵany týraly maǵan jazbasha túrde habarlaýdy suraimyn”, - dep jazdy ol.
Eger bul talaptar belgilengen merzimde oryndalmasa, sportshy óz quqyqtaryn qorǵaý úshin sotqa júginetinin jáne moraldyq shyǵyn óndirý máselesin kóteretinin eskertti.
Sonymen qatar ol qoǵamda “ajyrasqan” degen sózdiń adamǵa tańba retinde taǵylýyna qarsy ekenin aitty. Onyń pikirinshe, ajyrasý - ómirdiń bir kezeńi ǵana, al adamnyń qundylyǵy onyń mártebesimen ólshenbeidi. Sportshy ózin eń aldymen áiel, ana jáne kásibi maman retinde sipattap, qazaqstandyq áielderdi óz ómirin ózderi tańdaýǵa shaqyrdy.
