مەنى الاڭداتاتىنى ولاردىڭ دا كۇنى كەشە بەيبىت تۇرعىن بولعاندىعى، ولاردىڭ دا اتا-اناسى، بالا-شاعاسى، تۋىس-جەكجاتىنىڭ بارلىعى. "ولاردى اياماۋ كەرەك" ۇرانى الدەبىر اپەرباقان ساياسي شەشىمدەرگە الىپ بارا ما دەگەن ءقاۋپىم بار.
ءبىز مويىنداۋىمىز كەرەك: قازاقستان قوعامى راديكالدانعان ءدىني توپتارعا بولىنگەلى ونشاقتى جىل بولدى. سوناۋ 2003 جىلدارى-اق حيزبۋت تاحرير سەكىلدى نەشەتۇرلى اعىمدار ءورىپ جۇرەتىن. وعان ەرگەن جىگىتتەر، قىزدار ءبىزدىڭ قاسىمىزدان دا شىققان ەدى. سودان بەرى مەملەكەت اينالىسقانسىپ، شەكتەگەنسىپ، ءوز حالىنشە ارەكەتتەنگەنىمەن، ولارىنان تۇك شىقپادى. تەرروريستىك ارەكەتتەر دە ءوز وزىنەن ەنەرگيا الاتىن قۋاتتى يدەولوگيا. ەندى كەش... ەندى بەيبىت ەل، بەيبىت قالا دەگەن ۇعىم از ايتىلسا، تاڭعالماڭىز. سەبەبى، كۇرەس باستالعان سوڭ، وعان قارسى جاۋاپ تا سويقان بولادى. سەبەبى، ءبىز 15 جىل، كەمى وسىنداي ۋاقىت كەشىكتىك.
بۇعان كىنالى ءدىني باسقارما ەمەس، وقىتۋ جۇيەسى.
ءدىنتانۋ ماماندىقتارى، مىقتى تەولوگتار، ۋاجىنە ۇيىتا الاتىن وراتور يمامدار كوپ بولۋى ءارى ولار ەلگە جالتاقتامايتىن، ءپىتىر-ساداقاعا قارامايتىن، ءبىلىمدى ءدىندارلار دايارلانۋى ءتيىس ەدى. ءقازىر يمامداردىڭ ورنىن ءۋاجى دە، ءتاسىلى دە، مەتوديكاسى دا مىقتى ۆيرتۋالدى ۇستازدار باسىپ الدى. ولاردىڭ الدىن وراۋ ءۇشىن ايرىقشا كۇش-جىگەر كەرەك. ءبىلىم رەفورماسى قاساڭدىقتان، جالعاندىقتان، كوز بوياۋشىلىقتان باس تارتىپ، ناقتى رەفورما - ۇشتىلدىلىك ەمەس، رۋحاني ءبىلىم - ار ىلىمنە نەگىزدەلگەن رەفورما جۇرگىزۋىمىز كەرەك.
سوسىن جات اعىمعا كىرىپ كەتكەن ادامدى اتىپ تاستاۋمەن، ولتىرۋمەن ەشتەڭە بىتپەيدى. مەملەكەت ولاردىڭ بالا-شاعاسىن، تۋىس-تۋعاندارىن قورقىتىپ-ۇركىتپەي، سولارمەن ناقتى، ادامگەرشىلىك پرينسيپىندە جۇمىس جۇرگىزۋلەرى مىندەت. قازاقتىڭ سانى اتا بەرۋگە لايىقتى ەمەس. 17 ميلليون قازاقتىڭ 17ء-ىن ءبىر تۇندە اتقانىمىز جەڭىس ەمەس، تەرەڭىنە ۇڭىلسەك، جەڭىلىس. ولاردىڭ بۇل جولعا ءتۇسۋىنىڭ تۇپكى سەبەپتەرىنىڭ ءبىرى الەۋمەتتىك ماسەلەلەر ەكەنىن مويىنداۋىمىز كەرەك.
مەن سوسىن مىنانداي ءبىر ۇرەيلى سيتۋاسيانى كورىپ وتىرمىن. ادامداردىڭ تەررورلىق ارەكەتتەرگە ەتتەرى ۇيرەنە باستاعانداي. وسىدان 5 جىل بۇرىنعى قىرعىندار كەزىندە حالىق ۇدىرەيىسىپ، بۇلاي بولۋى مۇمكىن ەمەس دەگەندەي كۇي كەشىپ ەدى. ءقازىر وسىلاي بولۋعا ءتيىستى دەگەندەي، بەيجاي قابىلدادى. بۇل دا ويلانتارلىق قۇبىلىس.
ءتوقتارالى تاڭجارىق،
اۆتوردىڭ فەيسبۋكتەگى پاراقشاسىنان الىندى.
