Meni alańdatatyny olardyń da kúni keshe beibit turǵyn bolǵandyǵy, olardyń da ata-anasy, bala-shaǵasy, týys-jekjatynyń barlyǵy. "Olardy aiamaý kerek" urany áldebir áperbaqan saiasi sheshimderge alyp bara ma degen qaýpim bar.
Biz moiyndaýymyz kerek: Qazaqstan qoǵamy radikaldanǵan dini toptarǵa bólingeli onshaqty jyl boldy. Sonaý 2003 jyldary-aq Hizbýt tahrir sekildi neshetúrli aǵymdar órip júretin. Oǵan ergen jigitter, qyzdar bizdiń qasymyzdan da shyqqan edi. Sodan beri memleket ainalysqansyp, shektegensip, óz halinshe árekettengenimen, olarynan túk shyqpady. Terroristik áreketter de óz ózinen energiia alatyn qýatty ideologiia. Endi kesh... Endi beibit el, beibit qala degen uǵym az aitylsa, tańǵalmańyz. Sebebi, kúres bastalǵan soń, oǵan qarsy jaýap ta soiqan bolady. Sebebi, biz 15 jyl, kemi osyndai ýaqyt keshiktik.
Buǵan kináli dini basqarma emes, oqytý júiesi.
Dintaný mamandyqtary, myqty teologtar, ýájine uiyta alatyn orator imamdar kóp bolýy ári olar elge jaltaqtamaityn, pitir-sadaqaǵa qaramaityn, bilimdi dindárlar daiarlanýy tiis edi. Qazir imamdardyń ornyn ýáji de, tásili de, metodikasy da myqty virtýaldy ustazdar basyp aldy. Olardyń aldyn oraý úshin airyqsha kúsh-jiger kerek. Bilim reformasy qasańdyqtan, jalǵandyqtan, kóz boiaýshylyqtan bas tartyp, naqty reforma - úshtildilik emes, rýhani bilim - ar ilimne negizdelgen reforma júrgizýimiz kerek.
Sosyn jat aǵymǵa kirip ketken adamdy atyp tastaýmen, óltirýmen eshteńe bitpeidi. Memleket olardyń bala-shaǵasyn, týys-týǵandaryn qorqytyp-úrkitpei, solarmen naqty, adamgershilik printsipinde jumys júrgizýleri mindet. Qazaqtyń sany ata berýge laiyqty emes. 17 million qazaqtyń 17-in bir túnde atqanymyz jeńis emes, tereńine úńilsek, jeńilis. Olardyń bul jolǵa túsýiniń túpki sebepteriniń biri áleýmettik máseleler ekenin moiyndaýymyz kerek.
Men sosyn mynandai bir úreili sitýatsiiany kórip otyrmyn. Adamdardyń terrorlyq áreketterge etteri úirene bastaǵandai. Osydan 5 jyl burynǵy qyrǵyndar kezinde halyq údireiisip, bulai bolýy múmkin emes degendei kúi keship edi. Qazir osylai bolýǵa tiisti degendei, beijai qabyldady. Bul da oilantarlyq qubylys.
Toqtaráli TAŃJARYQ,
Avtordyń Feisbýktegi paraqshasynan alyndy.
