ءداستۇرلى فەستيۆالدى «QAZAQSTAN JASTARY» قق جانە قازاقستان ستۋدەنتتەرىنىڭ اليانسى ۇيىمداستىرسا، استانا قالاسىنىڭ جاستار ساياساتى ماسەلەلەرى باسقارماسى قولداۋ كورسەتكەن.
«Jastar Jalyny-2022» فەستيۆالى جالىندى بۋىننىڭ شىعارماشىلىق الەۋەتىن شىڭداۋعا، دارىندى جاستاردى انىقتاپ، بەلسەندى ستۋدەنتتەردى شابىتتاندىرۋعا سۇبەلى ۇلەس قوسىپ كەلەدى.
جاستاردىڭ رۋحاني جانە مادەني الەۋەتىن دامىتىپ، ستۋدەنتتەرگە ەستەتيكالىق جانە ەتيكالىق تاربيە بەرۋ جۇيەسىن جەتىلدىرۋمەن قاتار، ادامگەرشىلىك قۇندىلىقتار مەن كوشباسشىلىق قاسيەتتەرىن ارتتىرۋ دا فەستيۆالدىڭ نەگىزگى ماقساتىن ايقىنداپ بەردى.
اسىرەسە، كەيىنگى جىلدارى «Jastar Jalyny» فەستيۆالىنە ەلوردا جاستارى بەلسەندى قاتىسىپ، وزدەرى ءبىلىم الاتىن جوعارى وقۋ ورىندارىنىڭ بەدەلىن ارتتىرۋعا مەيلىنشى ۇلەس قوسۋدا دەسەك، اسىرا سىلتەگەنىمىز ەمەس.
ويتكەنى، اۋقىمدى فەستيۆالدە 10 نوميناسيا بويىنشا توپقا تۇسكەن جاستار جالپى ەسەپتە كوش باستاۋعا بارىن سالاتىنى ءسوزسىز. بۇل جولى فەستيۆالعا استانا قالاسىنداعى 14 ۋنيۆەرسيتتىڭ ستۋدەنتتەرى قاتىسىپ، مەديا، زاماناۋي بي، ۇلتتىق بي، ەسترادا، مۋزىكالىق اسپاپتار، ايتىس، پوەزيا، سۋرەت سالۋ، تەاتر، qazaq quiz اتالىمدارىندا كىم مىقتىنى انىقتادى.
شىعارماشىلىقتىڭ شىڭىنا شىعۋعا تالپىنىسى جوعارى جاستاردىڭ ونەرىن ءار سالانىڭ كىل مىقتى، تاجىريبەلى ءارى تانىمال ماماندارىنان جاساقتالعان قازىلار قۇرامى باعالادى. ونىڭ ىشىندە مادەنيەت جانە ونەر قايراتكەرلەرى، ەلگە ەڭبەگى سىڭگەن ارتىستەر، كاسىبي حورەوگرافتار دا بار.
جەڭىمپازداردى ماراپاتتاۋ راسىمىندە استانا قالاسى اكىمىنىڭ ورىنباسارى ەسەت بايكەن مەملەكەتتەن جاستاردى قولداۋ ماقساتىندا ىسكە اسىپ جاتقان جوبالار جونىندە از-كەم ايتىپ ءوتتى.
«ەل ۇكىمەتى جاستاردى قولداۋعا ايرىقشا كوڭىل ءبولىپ وتىر. استانا قالاسىنىڭ اكىمدىگى بيىل جاستاردى جۇمىسقا ورنالاستىرۋ ءۇشىن 60-تان استام بوس جۇمىس ورىندارى جارمەڭكەسىن وتكىزدى. ناتيجەسىندە 11 مىڭنان استام جاس تۇراقتى جۇمىسقا ورنالاستى. سونىمەن قاتار ەلوردامىز جاستاردىڭ قالاسىنا اينالۋدا. مەملەكەت تاراپىنان جاس وتباسىلارعا پاتەر بەرۋ باعىتىندا جۇيەلى جۇمىستار 2019 جىلدان بەلسەندى تۇردە باستالدى. جاس وتباسىلاردىڭ اياققا تۇرۋ ءۇشىن 5 جىلعا جالدامالى پاتەر بەرۋدەمىز. قالا اكىمدىگى «ەلوردا جاستارى» باعدارلاماسى بويىنشا جىل سايىن 200-دەن استام جاستىڭ باسپانالى بولۋىنا جاردەمدەسۋدە.
سونداي-اق مەكتەپ بىتىرگەننەن كەيىن وقۋعا تۇسە الماعان تۇلەكتەرگە ەلوردا اكىمدىگى ارنايى گرانتتار بولەدى. بيىل 1 300-دەن استام نارىقتاعى سۇرانىسقا يە ماماندىققا گرانت ءبولىندى.
بۇگىنگى فەستيۆال دە جىل سايىن ءداستۇرلى تۇردە ۇيىمداستىرىلىپ كەلەدى. ارينە مۇندا باستى ماقسات جەڭىس ەمەس، ەلوردانىڭ بەلسەندى جاستارى باس قوسىپ، ءبىرىن-بىرى جاقىن تاني تۇسسە دەگەن نيەت تە بار»، – دەيدى استانا قالاسى اكىمىنىڭ ورىنباسارى ەسەت بايكەن.
اپتا ىشىندە ءار نوميناسيا بويىنشا جەكەلەي سىندا ءبىرىنشى ورىن ەنشىلەگەندەر 100 مىڭ تەڭگەدەن سىياقى السا، ەكىنشى ورىن ولجالاعاندارعا 70 مىڭ تەڭگە تاعايىندالدى. ۇزدىك ۇشتىكتەن كورىنگەن ستۋدەنتتەرگە 50 مىڭ تەڭگەدەن ءتيدى.
ال جالپىكوماندالىق ەسەپتە بيىلعى فەستيۆالدىڭ باس جۇلدەسىن ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرى قانجىعاعا بايلادى. سول سەكىلدى ەكىنشى ورىندى Turan-Astana ۋنيۆەرسيتەتىنىڭ جاستارى جەڭىپ السا، ءۇشىنشى ورىن س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ستۋدەنتتەرىنە بۇيىرىپ، ولار دا قارجىلاي سىيلىقتان قۇر قالمادى.
