Dástúrli festivaldi «QAZAQSTAN JASTARY» QQ jáne Qazaqstan stýdentteriniń Aliansy uiymdastyrsa, Astana qalasynyń Jastar saiasaty máseleleri basqarmasy qoldaý kórsetken.
«Jastar Jalyny-2022» festivali jalyndy býynnyń shyǵarmashylyq áleýetin shyńdaýǵa, daryndy jastardy anyqtap, belsendi stýdentterdi shabyttandyrýǵa súbeli úles qosyp keledi.
Jastardyń rýhani jáne mádeni áleýetin damytyp, stýdentterge estetikalyq jáne etikalyq tárbie berý júiesin jetildirýmen qatar, adamgershilik qundylyqtar men kóshbasshylyq qasietterin arttyrý da festivaldiń negizgi maqsatyn aiqyndap berdi.
Ásirese, keiingi jyldary «Jastar Jalyny» festivaline elorda jastary belsendi qatysyp, ózderi bilim alatyn joǵary oqý oryndarynyń bedelin arttyrýǵa meilinshi úles qosýda desek, asyra siltegenimiz emes.
Óitkeni, aýqymdy festivalde 10 nominatsiia boiynsha topqa túsken jastar jalpy esepte kósh bastaýǵa baryn salatyny sózsiz. Bul joly festivalǵa Astana qalasyndaǵy 14 ýniversittiń stýdentteri qatysyp, media, zamanaýi bi, ulttyq bi, estrada, mýzykalyq aspaptar, aitys, poeziia, sýret salý, teatr, qazaq quiz atalymdarynda kim myqtyny anyqtady.
Shyǵarmashylyqtyń shyńyna shyǵýǵa talpynysy joǵary jastardyń ónerin ár salanyń kil myqty, tájiribeli ári tanymal mamandarynan jasaqtalǵan qazylar quramy baǵalady. Onyń ishinde mádeniet jáne óner qairatkerleri, elge eńbegi sińgen ártister, kásibi horeograftar da bar.
Jeńimpazdardy marapattaý rásiminde Astana qalasy ákiminiń orynbasary Eset Baiken memleketten jastardy qoldaý maqsatynda iske asyp jatqan jobalar jóninde az-kem aityp ótti.
«El úkimeti jastardy qoldaýǵa airyqsha kóńil bólip otyr. Astana qalasynyń ákimdigi biyl jastardy jumysqa ornalastyrý úshin 60-tan astam bos jumys oryndary jármeńkesin ótkizdi. Nátijesinde 11 myńnan astam jas turaqty jumysqa ornalasty. Sonymen qatar elordamyz jastardyń qalasyna ainalýda. Memleket tarapynan jas otbasylarǵa páter berý baǵytynda júieli jumystar 2019 jyldan belsendi túrde bastaldy. Jas otbasylardyń aiaqqa turý úshin 5 jylǵa jaldamaly páter berýdemiz. Qala ákimdigi «Elorda jastary» baǵdarlamasy boiynsha jyl saiyn 200-den astam jastyń baspanaly bolýyna járdemdesýde.
Sondai-aq mektep bitirgennen keiin oqýǵa túse almaǵan túlekterge elorda ákimdigi arnaiy granttar bóledi. Biyl 1 300-den astam naryqtaǵy suranysqa ie mamandyqqa grant bólindi.
Búgingi festival de jyl saiyn dástúrli túrde uiymdastyrylyp keledi. Árine munda basty maqsat jeńis emes, elordanyń belsendi jastary bas qosyp, birin-biri jaqyn tani tússe degen niet te bar», – deidi Astana qalasy ákiminiń orynbasary Eset Baiken.
Apta ishinde ár nominatsiia boiynsha jekelei synda birinshi oryn enshilegender 100 myń teńgeden syiaqy alsa, ekinshi oryn oljalaǵandarǵa 70 myń teńge taǵaiyndaldy. Úzdik úshtikten kóringen stýdentterge 50 myń teńgeden tidi.
Al jalpykomandalyq esepte biylǵy festivaldiń bas júldesin L.Gýmilev atyndaǵy Eýraziia ulttyq ýniversitetiniń stýdentteri qanjyǵaǵa bailady. Sol sekildi ekinshi oryndy Turan-Astana ýniversitetiniń jastary jeńip alsa, úshinshi oryn S.Seifýllin atyndaǵy Qazaq agrotehnikalyq ýniversitetiniń stýdentterine buiyryp, olar da qarjylai syilyqtan qur qalmady.
