Qazaqstandyq azamat ulynyń tusaýyn ataqty fýtbolshy Ronaldinoǵa kestirdi

Qazaqstandyq azamat ulynyń tusaýyn ataqty fýtbolshy Ronaldinoǵa kestirdi
Foto: videodan skrin

Qazaqstandyq azamat Dýbaida kishkentai ulynyń tusaýyn álem fýtbolynyń ańyzy atanǵan Ronaldinoǵa kestirdi. Erekshe rásim túsirilgen beinejazba áleýmettik jelide keńinen tarap jatyr, dep habarlaidy dalanews.kz.

Balanyń ákesi aldymen ulyna Lionel Messi, Maik Taison, Gennadii Golovkin jáne Ronaldino sekildi álemge tanymal tulǵalardyń sýretterin kórsetken. Búldirshin olardyń arasynan braziliialyq fýtbolshyny tańdaǵan. Osydan keiin ákesi ulynyń tusaýyn Ronaldinoǵa kestirýge sheshim qabyldaǵan.

Dýbaida ótken kezdesýde fýtbolshy balanyń aiaǵyna bailanǵan ala jipti ózi qiyp, qazaqtyń tusaýkeser dástúrine qatysty. Qazaq tanymynda bul rásim sábidiń qadamy nyq, joly ashyq bolsyn degen nietpen jasalady.

"Raqmet sizge, ańyzdardyń ańyzy! Eń myqtylardyń ishindegi eń myqtysy. Qudai qalasa, ulym da siz sekildi uly ári tanymal tulǵaǵa ainalsyn. Búkil álem, sonyń ishinde Qazaqstan da sizdi jaqsy kóredi jáne qurmetteidi", – dep jazdy balanyń ákesi.

Ol ulynyń bolashaqta esimi álemge tanylǵan, izgi qasietti azamat bolyp ósýin tilep, osy nietpen tusaýyn ataqty fýtbolshyǵa kestirgenin jetkizdi.

Jelide jariialanǵan video 1,3 millionnan astam qaralym jinady. Kópshilik Ronaldinonyń qazaqtyń ulttyq saltyna qurmet kórsetkenine jyly pikir bildirip jatyr.