تۇركىستان وبلىسىنىڭ اكىمى جانسەيىت تۇيمەبايەۆ قازاقستانداعى ىسكەر ايەلدەر قاۋىمداستىعىنىڭ پرەزيدەنتى راۋشان سارسەمبايەۆا مەن قاۋىمداستىقتىڭ تۇركىستان وبلىسى مەن شىمكەنت قالاسىنداعى وكىلدىكتەرىنىڭ جەتەكشى حانىمدارى قۇرالاي بەكەنوۆا، ينارا نامازبايەۆا، ەلميرا سوزاقبايەۆا سىندى ءبىرقاتار ىسكەر ايەلدەر قاۋىمىمەن كەزدەسىپ، كاسىپكەرلىككە قاتىستى ماڭىزدى ماسەلەلەردى ءسوز ەتتى.
اتاپ ايتار بولساق ىسكەر ايەلدەر قاۋىمداستىعىنىڭ تورايىمدارىمەن بولعان باسقوسۋدا جاڭا تۇركىستاننىڭ بولاشاقتاعى كەسكىن، كەلبەتى، الداعى جوسپارلارى تۋرالى كەڭىنەن ءسوز بولدى.
نازىك جاندىلار قاۋىمى وسىناۋ جاۋاپتى دا تاريحي ساتتەردە باس بولا بىلگەن ءوڭىر باسشىسىن جان-جاقتى قولدايتىندارىن، ءتىپتى ونى ودان ءارى كوركەيتۋگە ءوز ۇلەستەرىن قوسۋعا ءازىر ەكەندىكتەرىن جەتكىزدى. بارشا ىسكەر ايەلدەر قاۋىمىنىڭ اتىنان ءسوز العان راۋشان بىرگەباي قىزى تۇركىستان وبلىسىنىڭ اكىمدىگىمەن بىرگە بىرلەسكەن جوبالار جاساۋعا ۇسىنىس ايتا كەلگەن ەكەن.
اتاپ ايتقاندا، ىسكەر حانىم بۇكىل تۇركى تىلدەس حالىقتاردىڭ اتا جۇرتى - تۇركىستانداعى قىزمەت كورسەتۋ ساپاسىن حالىقارالىق تالاپتارعا ساي ەتىپ ۇيىمداستىرۋعا اتسالىسقىسى كەلەدى.
تۋريستەر كوپ كەلەتىن ورتالىقتاعى سەرۆيس ماسەلەسىن ارنايى ماماندارمەن وقىتۋ ارقىلى دامىتىپ، شەشۋدى ماقسات تۇتقان نازىك جاندىلار، سونىمەن بىرگە، كادەسىي جاساۋ ورتالىقتارىن دا كوپتەپ اشىپ، جۇمىستى جولعا قويۋدى ماقسات ەتىپ وتىرعانىن تىلگە تيەك ەتتى.
وڭىرىمىزدە بۇل سالادا تالانتتى ازاماتتاردىڭ جەتكىلىكتى ەكەنىن العا تارتقان ر.سارسەمبايەۆا ولاردىڭ باسىن قوسىپ، وقىتىپ، ۇيىمداستىرۋدا قاۋىمداستىق كۇشىنە سەنىمدى ەكەنىن ايتىپ ءوتتى.
ايەلدەر قاۋىمداستىعىنىڭ ءتۇرلى سالالاردا تاجىريبەگە باي ەكەنىن ايتقان ىسكەر حانىم تۇركىستان شاھارىنىڭ سىرتقى كەلبەتىنە دە وتباسى، وشاق قاسىنىڭ ۇيىتقىسى بولا بىلگەن ايەلدەر قاۋىمىنىڭ - نازىك جاندىلاردىڭ قۋاتى مەن كۇشىن جۇمساۋعا نيەتتەنگەنى ارتىقتىق ەتپەيتىنىن ءبىلدىردى.
ءوز كەزەگىندە وسىناۋ جيىنعا قاتىسۋشى قىز-كەلىنشەكتەر قاۋىمىنىڭ ۇسىنىس-تىلەكتەرىن مۇقيات تىڭداعان وبلىس اكىمى ج.تۇيمەبايەۆ اتالعان جوبالاردى بىرلەسە ازىرلەۋگە دايىن ەكەنىن العا تارتىپ، الداعى ۋاقىتتا ءتۇرلى جۇمىستاردى بىرىگە اتقارۋدا قولدايتىنىن جەتكىزدى.
