قازاقستان مۇسىلماندارى ءدىني باسقارماسىنىڭ باسپا ءسوز حاتشىسى اعابەك قونارباي ۇلى باس ءمۇفتي ناۋرىزباي قاجى تاعانۇلىنا قاتىستى ايتىلعان سىنعا جاۋاپ بەردى. ول Facebook پاراقشاسىندا جازبا جاريالاپ، ءدىني باسقارما مەن يمامداردىڭ ەلدە بولىپ جاتقان اۋىر وقيعالاردان ەش ۋاقىتتا سىرت قالماعانىن مالىمدەدى، دەپ حابارلايدى Dalanews.kz.
اعابەك قونارباي ۇلىنىڭ جازۋىنشا، ەل ىشىندە رەزونانس تۋدىرعان قايعىلى جايتتار كەزىندە يمامدار ءۇنسىز ارەكەت ەتىپ كەلەدى.
"يمامدار قوعام الدىنداعى مىندەتىن ەشكىمگە جاريالاماي-اق اتقارىپ ءجۇر. ولار ونسىز دا قايعىنىڭ بەل ورتاسىندا جۇرەدى. بۇل – ولاردىڭ مىندەتى. ءبىراق ونى ەشكىمگە مىندەتسىمەيدى. بەس ءبۇلدىرشىننىڭ قازاسى ءبارىمىزدىڭ جۇرەگىمىزدى اۋىرتتى. قوس اياعىنان ايىرىلعان قىزدىڭ تاعدىرى دا ءبىزدى بەي-جاي قالدىرمادى. ءدىني باسقارما بۇل وقيعالاردان تىس قالعان جوق"، – دەپ جازدى ول.
ونىڭ ايتۋىنشا، ءومىر تەك قارالى ساتتەردەن تۇرمايدى. باس ءمۇفتيدىڭ تەك قارالى جيىنداردا عانا ەمەس، قۋانىشتى ساتتەردە دە توبە كورسەتۋى، باتا بەرۋى – ورىندى ءىس. اعابەك قونارباي ۇلىنىڭ بۇل جازباسى قوعامداعى قىزۋ پىكىرتالاسقا جاۋاپ رەتىندە جاريالاندى.
بۇعان دەيىن الەۋمەتتىك جەلىدە باس ءمۇفتي ناۋرىزباي قاجى تاعان ۇلىنىڭ ءانشى ساكەن مايعازييەۆتىڭ ۇلىنىڭ تويىندا باتا بەرگەن ۆيدەوسى تاراعان. بۇل ارەكەت قوعامنىڭ ءبىر بولىگىنىڭ نارازىلىعىن تۋدىردى. جۋرناليست دياس نۇراقىن ءمۇفتيدىڭ تويعا بارعانىن سىناپ، «بقو-دا بەس بالا ورتەنىپ كوز جۇمعاندا جانازاسىنا بارماعان، اقتاۋدا ۇشاق اپاتقا ۇشىراعاندا قۇران باعىشتاماعان، استانادا كىشكەنتاي قىز ەكى اياعىنان ايىرىلعاندا ۇندەمەگەن باس ءمۇفتي بۇگىن ءانشىنىڭ تويىندا ءجۇر» دەپ جازدى.
ال جۋرناليست وراز الىمبەك باس ءمۇفتيدىڭ ارەكەتىن بيزنەسكە اينالدىردى دەپ سىنعا الدى. «ساكەن جول شىعىنىن وتەپ، شاپان جاۋىپ، بورىك كيگىزىپ، قالتاسىنا حاديا سالىپ بەرەدى عوي. ال قازا بولعاندار مەن مۇگەدەك بولىپ قالعان قىزدىڭ تۋىستارى نە بەرەدى؟» – دەپ جازدى ول.
دەگەنمەن، باس ءمۇفتيدى جاقتاپ، قولداۋ بىلدىرگەندەر دە تابىلدى. سولاردىڭ ءبىرى جاسۇلان ايتباي: «كوپ ايتسا كوندى، جۇرت ايتسا ناندى دەگەن ءسوز بار. تويعا بارسا نە بولىپتى؟ ول دا ادام. اركىم ءوز جۇمىسىن ىستەسىن، تىنىش تىرلىك جاسايىق»، – دەپ پىكىر قالدىردى.
ايتا كەتەيىك، بۇعان دەيىن ءانشى ساكەن مايعازييەۆ ۇلىنىڭ تويىن كورگىسى كەلگەندەردەن 1380 تەڭگەدەن اقشا جيناعانى جايلى اقپارات تاراعان. بۇل دا قوعامدا سىنعا ۇشىراعان بولاتىن.
