Qazaqstan musylmandary dini basqarmasynyń baspasóz hatshysy Aǵabek Qonarbaiuly bas múfti Naýryzbai qajy Taǵanulyna qatysty aitylǵan synǵa jaýap berdi. Ol Facebook paraqshasynda jazba jariialap, dini basqarma men imamdardyń elde bolyp jatqan aýyr oqiǵalardan esh ýaqytta syrt qalmaǵanyn málimdedi, dep habarlaidy Dalanews.kz.
Aǵabek Qonarbaiulynyń jazýynsha, el ishinde rezonans týdyrǵan qaiǵyly jaittar kezinde imamdar únsiz áreket etip keledi.
"Imamdar qoǵam aldyndaǵy mindetin eshkimge jariialamai-aq atqaryp júr. Olar onsyz da qaiǵynyń bel ortasynda júredi. Bul – olardyń mindeti. Biraq ony eshkimge mindetsimeidi. Bes búldirshinniń qazasy bárimizdiń júregimizdi aýyrtty. Qos aiaǵynan aiyrylǵan qyzdyń taǵdyry da bizdi bei-jai qaldyrmady. Dini basqarma bul oqiǵalardan tys qalǵan joq", – dep jazdy ol.
Onyń aitýynsha, ómir tek qaraly sátterden turmaidy. Bas múftidiń tek qaraly jiyndarda ǵana emes, qýanyshty sátterde de tóbe kórsetýi, bata berýi – oryndy is. Aǵabek Qonarbaiulynyń bul jazbasy qoǵamdaǵy qyzý pikirtalasqa jaýap retinde jariialandy.
Buǵan deiin áleýmettik jelide bas múfti Naýryzbai qajy Taǵanulynyń ánshi Sáken Maiǵazievtiń ulynyń toiynda bata bergen videosy taraǵan. Bul áreket qoǵamnyń bir bóliginiń narazylyǵyn týdyrdy. Jýrnalist Dias Nuraqyn múftidiń toiǵa barǵanyn synap, «BQO-da bes bala órtenip kóz jumǵanda janazasyna barmaǵan, Aqtaýda ushaq apatqa ushyraǵanda Quran baǵyshtamaǵan, Astanada kishkentai qyz eki aiaǵynan aiyrylǵanda úndemegen bas múfti búgin ánshiniń toiynda júr» dep jazdy.
Al jýrnalist Oraz Álimbek bas múftidiń áreketin bizneske ainaldyrdy dep synǵa aldy. «Sáken jol shyǵynyn ótep, shapan jaýyp, bórik kigizip, qaltasyna hadiia salyp beredi ǵoi. Al qaza bolǵandar men múgedek bolyp qalǵan qyzdyń týystary ne beredi?» – dep jazdy ol.
Degenmen, bas múftidi jaqtap, qoldaý bildirgender de tabyldy. Solardyń biri Jasulan Aitbai: «Kóp aitsa kóndi, jurt aitsa nandy degen sóz bar. Toiǵa barsa ne bolypty? Ol da adam. Árkim óz jumysyn istesin, tynysh tirlik jasaiyq», – dep pikir qaldyrdy.
Aita keteiik, buǵan deiin ánshi Sáken Maiǵaziev ulynyń toiyn kórgisi kelgenderden 1380 teńgeden aqsha jinaǵany jaily aqparat taraǵan. Bul da qoǵamda synǵa ushyraǵan bolatyn.
