U.S. News & World Report ساراپشىلارى زەينەت جاسىندا جايلى ءومىر سۇرۋگە قولايلى ەلدەردىڭ رەيتينگىن جاريالادى. 89 مەملەكەتتى قامتىعان تىزىمدە قازاقستان 77-ورىنعا تۇراقتادى. بۇل كورسەتكىش ەلدىڭ ءومىر ءسۇرۋ قۇنى، سالىق، دەنساۋلىق ساقتاۋ جۇيەسى، كليمات، مەنشىك قۇقىعىن قورعاۋ جانە جالپى ءومىر سۇرۋگە قولايلىلىق سياقتى بىرنەشە فاكتور بويىنشا باعالانعان، دەپ حابارلايدى Dalanews.kz energyprom.kz دەرەگىنە سىلتەپ.

رەيتينگتە قازاقستاننان تومەن ورىن العان ەلدەر قاتارىندا ازەربايجان (81)، وزبەكستان (84)، ۋكراينا (85)، بەلارۋس (87) جانە رەسەي (89) بار. سوڭعى ورىندا يران. ال العاشقى وندىققا ەۋروپانىڭ دامىعان ەلدەرى، سونداي-اق، جاڭا زەلانديا، اۋستراليا جانە كانادا ەنگەن. ماسەلەن گانا (75)، جۇڭگو (61)، جاپونيا (34) جانە تۇركيا (33) قازاقستاننان جوعارى تۇر.

سونىمەن قاتار، ەلدەگى زەينەتكەرلەر سانى ارتىپ كەلەدى. بجزق دەرەگىنشە، زەينەتاقى تولەمىن الۋشىلار سانى 1،52 ملن ادامعا جەتكەن. ونىڭ 684،4 مىڭى - جاسىنا بايلانىستى زەينەتكەرلەر.

2024 جىلعى مالىمەت بويىنشا سالىمشىلاردىڭ 65،4%-ى جىلىنا 9-12 رەت جارنا اۋدارعان. 2025 جىلعى ساۋالناما ناتيجەسىنە سايكەس قازاقستاندىقتاردىڭ 39،3%-ى بولاشاقتا نەگىزگى تابىس كوزى رەتىندە زەينەتاقى قورىنداعى جيناعىنا سەنەدى. 25%-ى مەملەكەت تولەيتىن زەينەتاقىعا ءۇمىت ارتسا، 15،6%-ى وزگە جيناقتارىنا، 11،6%-ى بيزنەسىنە سەنىم بىلدىرگەن.

ساراپشىلاردىڭ باعاسى سۋبەكتيۆتى بولۋى مۇمكىن. دەگەنمەن زەرتتەۋ ناتيجەسى قازاقستاندىقتاردىڭ زەينەت جاسىنداعى قارجىلىق تۇراقتىلىق ماسەلەسىنە الاڭدايتىنىن اڭعارتادى.