مونوپولياعا قارسى ورگان "Fly Arystan" اۋە تاسىمالداۋشىسى تاراپىنان ۇستەم جاعدايدى تەرىس پايدالانۋ بەلگىلەرىن انىقتادى. تالداۋ بارىسىندا اۆيابيلەتتەردىڭ قۇنى برونداۋدىڭ ءارتۇرلى كەزەڭدەرىندە اۆتوماتتى تۇردە قوسىلاتىن جاسىرىن قوسىمشا اقىلار ەسەبىنەن وسكەنى انىقتالدى، دەپ حابارلايدى Dalanews.kz ق ر باسەكەلەستىكتى قورعاۋ جانە دامىتۋ اگەنتىگىنە سىلتەمە جاساي وتىرىپ.
"اۆياتاسىمالداۋشى اۋە بيلەتتەرىن ساتۋ كەزىندە ترانزاكسيا ءۇشىن كوميسسيا الۋ ارقىلى اۋە بيلەتىنىڭ قۇنىن ارتتىرعان. بۇل "drip pricing" دەپ اتالادى، دەمەك، "تامشىلاپ باعا وسىرگەن". نەگىزىنەن ەۋروپالىق زاڭنامادا بۇعان مۇلدەم تىيىم سالىنعان. وسى فاكتىلەردى ءبىز انىقتاپ، اۆياتاسىمالداۋشىعا قاتىستى مونوپولياعا قارسى زاڭنامانى بۇزۋدى توقتاتۋ تۋرالى حابارلاما جولدادىق. ول كەيىننەن ورىندالدى"، - دەدى باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى مارات وماروۆ بقدا القا وتىرىسىندا.
قازىرگى ۋاقىتتا اگەنتتىك ىشكى اۆياتاسىمالدار نارىعىنا قاتىستى مونوپولياعا قارسى تالداۋ جۇرگىزىپ جاتقانى دا ناقتىلانادى.
بۇعان دەيىن بالانى اۋەجايدا جالعىز قالدىرىپ كەتكەن Air Astana اۋە كومپانياسى وتەماقى تولەگەنىن جازعانبىز. سونداي-اق 2024 جىلى كۇزدە جولاۋشىلار قۇقىعىن بۇزعان Fly Arystan اۋە كومپانياسىنا 3،5 ميلليون تەڭگە كولەمىندە ايىپپۇل سالىنعانى بەلگىلى.
