الماتى قالاسىندا ەرەكشە قاجەتتىلىگى بار جاندارعا ارنالعان شىعارماشىلىق باعىتتاعى ەرەكشە ءبىر كەڭىستىك جۇمىس ىستەيدى. بۇل — 2023 جىلدىڭ ناۋرىز ايىندا جۇمىسپەن قامتۋ جانە الەۋمەتتىك باعدارلامالار باسقارماسىنىڭ قولداۋىمەن پيلوتتىق رەجيمدە اشىلعان الەۋمەتتىك ينتەگراسيا ورتالىعى. جوبانىڭ باستى ماقساتى — مۇمكىندىگى شەكتەۋلى ازاماتتارعا ءوزىن-وزى تانىتۋعا، قوعامعا ارالاسۋعا مۇمكىندىك بەرۋ. ورتالىقتا كورسەتىلەتىن قىزمەتتەر جايلى تولىعىراق ءبىلۋ ءۇشىن Dalanews.kz ءتىلشىسى الەۋمەتتىك ينتەگراسيا ورتالىعىنىڭ جەتەكشىسى بەكەنوۆا جاننامەن سۇحباتتاستى.
شىعارماشىلىق — ەركىندىك ءتىلى
ورتالىقتىڭ جەتەكشىسى جاننا بەكەنوۆانىڭ ايتۋىنشا، مۇندا 10 جاستان باستاپ زەينەت جاسىنا دەيىنگى جاندار قابىلدانادى. ورتالىقتىڭ باعىتى شىعارماشىلىققا نەگىزدەلگەن: ۆوكال، حورەوگرافيا، اكتەرلىك شەبەرلىك، فوتو جانە ۆيدەو-وپەراتورلىق ساباقتار، دومبىرا، ادەبيەت پەن بلوگ جۇرگىزۋ، IT، شاحمات، توعىزقۇمالاق، روبوتوتەحنيكا — مۇنىڭ ءبارى تەگىن. سونىمەن قاتار، ورتالىقتا كاسىبي پسيحولوگ جۇمىس ىستەيدى. ول ورتالىققا كەلۋشىلەرمەن جەكە دە، توپتىق تا جۇمىستار جۇرگىزەدى.
«بىزگە كەلگەن ءاربىر جاننىڭ دارىنىن اشۋعا كومەكتەسۋگە تىرىسامىز. ءان ايتقىسى كەلەتىن، ءبىراق ۇيالاتىندار، كامەرادان قورقاتىندار، كوپتىڭ الدىندا سويلەۋدەن قىمسىناتىندار — وسىنىڭ ءبارى بىزدە ەركىن ورتادا اشىلا باستايدى»، — دەيدى جاننا نۋرابايەۆنا.
بۇگىندە ورتالىققا كۇنىنە شامامەن 60 ادام كەلەدى. اشىلعاننان بەرى 126 ادام تىركەلىپ ۇلگەرگەن. ولاردىڭ ىشىندە مۇگەدەكتىكتىڭ 1، 2، 3-توپتارىنداعى جاندار بار. ساباقتار تاڭەرتەڭگى 10:00-دەن كەشكى 17:00-گە دەيىن وتەدى. مۇگەدەك ارباسىمەن كەلەتىن جاندار ينۆاتاكسي كومەگىن پايدالانادى.
«باستاپقىدا ۇيالشاق بولعان داۋنا سيندرومى بار بالامىز ءقازىر جاڭادان كەلگەندەردى ءوزى قارسى الىپ، ورتالىقتى تانىستىرىپ جۇرەدى. جالپى ساباقتاردان سوڭ بالالار ويىن جاقسى جەتكىزىپ ۇيرەنەدى. مەرەكەلەردە كونسەرتتەر ۇيىمداستىرىپ تۇرامىز. قولونەر ساباعى بار. كەيدە اتا-انالار وزدەرىمەن بىرگە كەرەك-جاراقتارىن الىپ كەلىپ، بالالارمەن بىرگە ساباققا كىرىپ، بىرگە جاسايدى»، — دەيدى ورتالىق جەتەكشىسى.
اتا-انالار نە دەيدى؟
نازيرا ابدراحمانوۆا 23 جاستاعى قىزىن بيگە، ۆوكالعا، ەندى فوتوستۋديا ساباعىنا اكەلىپ ءجۇر.
«بۇل جەرگە وتكەن جىلدان بەرى كەلەمىز. ورتالىق جايلى وسى جەرگە كەلەتىن ءبىر بالادان ەستىدىم. الىستا تۇرامىز. سوندىقتان قىستا كەلۋ قيىنداۋ، ءبىراق كۇن جىلىنعاندا ساباقتاردان قالماۋعا تىرىسامىز. ەڭ باستىسى، بالامنىڭ كوڭىل-كۇيى وزگەردى، دوس تاپتى. ءبيدى وتە جاقسى كورەدى. ءقازىر فوتوستۋديا دەگەن ساباققا كەلىپ باستادىق. بالاما سول ساباق قاتتى ۇناپ قالدى، اپايى دا بالانىڭ يكەمى بار ەكەنىن ايتتى. سۋرەتتەردى وڭدەپ باستاپ كەتتى»، — دەيدى ول.
ساۋلە دالابايەۆا 15 جاستاعى قىزى - بوتانى بيگە، ادەبيەتكە اكەلەدى.
«ءبىز - بۇل ورتالىق اشىلعان كەزدە ەڭ ءبىرىنشى بولىپ كەلگەن جانداردىڭ ءبىرىمىز. قىزىم اسىرەسە بيگە جاقىن. ادەبيەتتى ەرەكشە ۇناتادى. ءبىز باسقا دا ورتالىقتارعا بارامىز. سوندىقتان ۋاقىت تاپشى، الايدا ساباقتاردى قالدىرماۋعا تىرىسامىز. سەبەبى قىزىما بۇل ورتالىق ەرەكشە ۇنايدى. مۇعالىمدەر جاس ماماندار، سوندىقتان دا شىعار، بالالارمىزبەن تەز ءتىل تابىسىپ كەتەدى. قىزىم "بارعىم كەلەدى، ۇيرەنگىم كەلەدى" دەپ ءوزى سۇرانىپ تۇرادى»، — دەيدى ول.
ال اۋتيزم دياگنوزى بار قىزىن اكەلەتىن ساۋلە وردابايەۆا «بلوگ جۇرگىزۋ مەن فوتوستۋديا ساباعىنىڭ" ماڭىزىن ەرەكشە اتاپ ءوتتى.
"قىزىمنىڭ كەلىپ جۇرگەنىنە ءبىر جارىم جىلداي بولدى. قىزىمنان كوپ وزگەرىس بايقاپ جاتىرمىن. بلوگ جۇرگىزۋدى ۇيرەتەتىن ساباققا قاتىسامىز. ءقازىر قىزىم بلوگ جۇرگىزەدى. مۇعالىمدەر وتە جاقسى. ەرەكشە ورتالىق، العىسىم شەكسىز"، - دەيدى ساۋلە وردابايەۆا.
ءمۇعالىم تاڭداۋ – جاۋاپتى ءىس
ورتالىقتا مامان تاڭداۋعا ەرەكشە ءمان بەرەدى.
"ءبىز ورتالىققا ءمۇعالىم العان كەزدە ونىڭ بالالارمەن قارىم-قاتىناس قۇرا الۋ قابىلەتىنە ەرەكشە ءمان بەرەمىز. سەبەبى ەڭ ماڭىزدىسى - بالامەن جاقسى قارىم-قاتىناس قۇرا ءبىلۋ. بالانىڭ وسى جەرگە كەلگىسى كەلۋى مۇعالىمگە تىكەلەي بايلانىستى"، - دەيدى بەكەنوۆا جاننا.
پرەزيدەنت قاسىم-جومارت توقايەۆ: «ءبىز ەرەكشە قاجەتتىلىكتەرى بار ادامدار ءۇشىن بىردەي مۇمكىندىك جاساۋعا مىندەتتىمىز» دەگەن ەدى. بۇل ورتالىق — سول ءسوزدىڭ ناقتى جۇزەگە اسۋى. ءقازىر بالالارمەن بىرگە تەاترعا، مۇراجايعا، تابيعات اياسىنا سەرۋەندەر ءجيى ۇيىمداستىرىلادى. ەڭ باستىسى – ولار وزدەرىن قوعامنىڭ تولىققاندى مۇشەسى سەزىنە باستايدى.
