اسكەردە ءجۇرىپ، باس-مي جاراقاتىن العان ەربايان مۇحتاردىڭ قازىرگى جاعدايى بەلگىلى بولدى، دەپ حابارلايدى Dalanews.kz.

ساربازدىڭ اتا-اناسى Instagram جەلىسىندە ۇلىنىڭ سۋرەتىن جاريالادى.

“ەگەر مۇمكىندىگىڭىز بولسا، بۇگىن تۇندە ەرباياننىڭ ساۋىعىپ، اياققا تۇرۋىن تىلەپ قويىڭىزشى. سۋرەتتە – ەرباياننىڭ قازىرگى جاعدايى. شۇكىر”، – دەلىنگەن جازبادا.

ەسكە سالايىق، بىلتىر جەلتوقسان ايىندا ۇلتتىق ۇلان جاۋىنگەرى ەربايان مۇحتار العان جاراقاتىنا بايلانىستى كوماعا تۇسكەن ەدى.

ق ر ءىىم ۇلتتىق ۇلانىنىڭ باسپا ءسوز قىزمەتى ساربازدىڭ دەنساۋلىعىنا قاتىستى رەسمي مالىمدەمە جاساعان بولاتىن. 

ۇلتتىق ۇلاننىڭ حابارلاۋىنشا، قاتارداعى ەربايان مۇحتاردىڭ باس جاراقاتىن الۋ فاكتىسى بويىنشا ق ر قك 440-بابى 4-تارماعىنىڭ 3-بولىگىنە ساي قىلمىستىق ءىس قوزعالعان.

اتالعان وقيعادان سوڭ ەربايان مۇحتار ىستانبۇلعا جول تارتتى. مۇندا وعان ءساتتى وتا جاسالدى. 

ال جاقىندا قۇقىق قورعاۋشى جانە زاڭگەر ينگا يمانباي ەربايان مۇحتارعا قاتىستى قىلمىستىق ءىس پەن سوتقا قاتىستى ساۋالدارعا جاۋاپ بەرگەن بولاتىن.

"ءدال ءقازىر ءبىز الماتى قالاسىنداعى اسكەري-تەرگەۋ باسقارماسىنىڭ الدىندا تۇرمىز. مەن جاڭا عانا ەربايان مۇحتاردىڭ ءىسى بويىنشا تەرگەۋشىگە جولىعىپ شىقتىم. وسى تۇستا انىقتاپ ايتا كەتكىم كەلەتىنى – سوت ءالى بولعان جوق. ەرباياننىڭ ءىسى تەرگەۋ ساتىسىندا.

ءدال ءقازىر ەرباياننىڭ جاعدايىنا بايلانىستى ەكى قىلمىستىق ءىس تەرگەلىپ جاتىر. ول اسكەردە بولعان جاعدايعا بايلانىستى جانە اۋرۋحاناداعى دارىگەرلەردىڭ ارەكەتىنە بايلانىستى. كەيبىر ساراپتامالاردىڭ قورىتىندىسى شىققان. كەي ساراپتاما جاڭادان تاعايىندالدى. سوندىقتان ءدال ءقازىر سوت قاشان بولاتىنىن ايتقان جوق. مىندەتتى تۇردە تەرگەۋ بارىسىندا سوتتىڭ قاشان بولاتىنى انىقتالعان كەزدە حابار بەرەمىن"، دەدى ينگا يمانباي.