Áskerde júrip, bas-mi jaraqatyn alǵan Erbaian Muhtardyń qazirgi jaǵdaiy belgili boldy, dep habarlaidy Dalanews.kz.
Sarbazdyń ata-anasy Instagram jelisinde ulynyń sýretin jariialady.
“Eger múmkindigińiz bolsa, búgin túnde Erbaiannyń saýyǵyp, aiaqqa turýyn tilep qoiyńyzshy. Sýrette – Erbaiannyń qazirgi jaǵdaiy. Shúkir”, – delingen jazbada.
Eske salaiyq, byltyr jeltoqsan aiynda Ulttyq ulan jaýyngeri Erbaian Muhtar alǵan jaraqatyna bailanysty komaǵa túsken edi.
QR IIM Ulttyq ulanynyń baspasóz qyzmeti sarbazdyń densaýlyǵyna qatysty resmi málimdeme jasaǵan bolatyn.
Ulttyq ulannyń habarlaýynsha, qatardaǵy Erbaian Muhtardyń bas jaraqatyn alý faktisi boiynsha QR QK 440-baby 4-tarmaǵynyń 3-bóligine sai qylmystyq is qozǵalǵan.
Atalǵan oqiǵadan soń Erbaian Muhtar Ystanbulǵa jol tartty. Munda oǵan sátti ota jasaldy.
Al jaqynda quqyq qorǵaýshy jáne zańger Inga Imanbai Erbaian Muhtarǵa qatysty qylmystyq is pen sotqa qatysty saýaldarǵa jaýap bergen bolatyn.
"Dál qazir biz Almaty qalasyndaǵy áskeri-tergeý basqarmasynyń aldynda turmyz. Men jańa ǵana Erbaian Muhtardyń isi boiynsha tergeýshige jolyǵyp shyqtym. Osy tusta anyqtap aita ketkim keletini – sot áli bolǵan joq. Erbaiannyń isi tergeý satysynda.
Dál qazir Erbaiannyń jaǵdaiyna bailanysty eki qylmystyq is tergelip jatyr. Ol áskerde bolǵan jaǵdaiǵa bailanysty jáne aýrýhanadaǵy dárigerlerdiń áreketine bailanysty. Keibir saraptamalardyń qorytyndysy shyqqan. Kei saraptama jańadan taǵaiyndaldy. Sondyqtan dál qazir sot qashan bolatynyn aitqan joq. Mindetti túrde tergeý barysynda sottyń qashan bolatyny anyqtalǵan kezde habar beremin", dedi Inga Imanbai.
