ءىس-شارانىڭ ماقساتى – قازاقستان جوعارى وقۋ ورىندارىنىڭ جانە باسقا مۇددەلى ۇيىمداردىڭ وكىلدەرىن ەرازمۋس+ بەسىنشى بايقاۋىنىڭ تالاپتارى، ىرىكتەۋ ءراسىمى، ۇلتتىق جانە ايماقتىق باسىمدىقتارى تۋرالى اقپاراتتارمەن تانىستىرۋ، سونداي-اق ەرازمۋس+ ءىس-شارالارىنا قاتىسۋعا تىلەك بىلدىرۋشىلەرگە پراكتيكالىق كەڭەس بەرۋ بولىپ تابىلادى.
ەرازمۋس+ باعدارلاماسىنىڭ اقپاراتتىق كۇنىنە الماتى ايماقتىق رەكتورلار كەڭەسىنىڭ ءتوراعاسى، اباي اتىنداعى قازۇپۋ رەكتورى تاكير بالىقبايەۆ، قر-داعى فرانسۋز ەلشىلىگى باس كونسۋلدىعىنىڭ ۋنيۆەرسيتەتتىك ىنتىماقتاستىعى بويىنشا اتتاشەسى جيل مەمەتس، قازاقستانداعى ەرازمۋس+ باعدارلاماسىنىڭ ۇلتتىق ۇيلەستىرۋشىسى شايزادا تاسبولاتوۆا، ۋنيۆەرسيتەتتىڭ پروفەسسور-وقىتۋشىلار قۇرامى، رەسپۋبليكامىزدىڭ وڭىرلەرىنەن كەلگەن جوعارى وقۋ ورىندارىنىڭ وكىلدەرى قاتىستى.
ءىس-شارا بارىسىندا رەكتور تاكير بالىقبايەۆ ەۋروپالىق باعدارلامالاردىڭ ماڭىزدىلىعىنا جانە ەرەكشەلىكتەرىنە توقتالىپ ءوتتى:
– ەرازمۋس+ باعدارلاماسى ءبىلىم بەرۋ جۇيەسىن تۇراقتى دامىتۋ مەن ونىڭ تيىمدىلىگىن ارتتىرۋ ارقىلى قازاقستاندىق ءبىلىمنىڭ حالىقارالىق دەڭگەيگە كوتەرىلۋىنە ىقپال ەتەدى. بۇل باعدارلامالار ءبىزدىڭ وقىتۋشىلارىمىزعا جانە ستۋدەنتتەرگە جوعارى ءبىلىم بەرۋدە ماڭىزدى تاجىريبەگە يە بولۋعا، باسەكەگە قابىلەتتىلىكتى ارتتىرۋ ماقساتىندا كاسىبي دەڭگەيىن دامىتا وتىرىپ، جاھاندىق نارىقتىق جاعدايلارعا دايىن بولۋعا، قاجەتتى داعدىلاردى قالىپتاستىرۋ، كاسىبي دەڭگەيىن كوتەرۋ جانە مادەنيەتارالىق تۇسىنىستىكتى ارتتىرۋ مۇمكىندىكتەرىن بەرەدى، – دەدى.
«جوعارى ءبىلىم بەرۋ سالاسىنداعى الەۋەتتى ارتتىرۋ» جوبالارىنا (بۇدان ءارى - ءجبباا) قاتىسۋشىلارعا، الەۋەتتى قوسىمشالاردى ازىرلەۋشىلەرگە جانە وقۋ ورىندارىنىڭ حالىقارالىق بولىمشەلەرىنىڭ قىزمەتكەرلەرىنە ەرازمۋس+ باعدارلاماسىنىڭ ۇلتتىق ۇيلەستىرۋشىسى شايزادا تاسبولاتوۆا ەرازمۋس+ باعدارلاماسىنىڭ نەگىزگى سيپاتتامالارى، ەرازمۋس+ باعدارلاماسىنىڭ جوعارى ءبىلىم بەرۋ الەۋەتىن ارتتىرۋ مەن حالىقارالىق كرەديتتىك ۇتقىرلىق كومپونەنتتەرىنە سايكەس IV بايقاۋدىڭ ناتيجەلەرى، باعدارلامانىڭ نەگىزگى 2 ارەكەتى تۋرالى، اتاپ ايتقاندا: 1) حالىقارالىق كرەديتتىك ۇتقىرلىق جانە ەرازمۋس مۋندۋس (Erasmus Mundus) بىرلەسكەن ماگيسترلىك باعدارلامالارى؛ 2) جوعارى ءبىلىم سالاسىنىڭ الەۋەتىن ارتتىرۋ، بەسىنشى جوبا بايقاۋىنىڭ جاڭالىقتارى، ۇلتتىق جانە ايماقتىق باسىمدىقتار بويىنشا تولىق اقپارات بەردى.
سونىمەن قاتار شاراعا قاتىسۋشىلارعا ەرازمۋس+ باعدارلاماسىنىڭ ۇلتتىق كەڭسەسىنىڭ وكىلدەرى «جان مونە» باعدارلاماسى بويىنشا، ەرازمۋس+ جوباسى تۋرالى اقپاراتتاندىرۋ جانە جوعارى ءبىلىم بەرۋ رەفورماسى بويىنشا ساراپشىلاردىڭ ۇلتتىق كومانداسىنىڭ قىزمەتى تۋرالى اقپارات بەردى. سونىمەن قاتار، ءجبباا جوباسىنىڭ قاتىسۋشىلارى مەن جوبالىق وتىنىمدەردى ازىرلەۋشى تاراپتار ءۇشىن ارنايى سەسسيالار ۇيىمداستىرىلدى. قاتىسۋشىلارعا ەراسمۋس+ باعدارلاماسىنىڭ اياسىندا جەكە جانە توپتىق اقپاراتتار بەرىلىپ، جوبا ۇيلەستىرۋشىلەرى مەن توپ مۇشەلەرىنە قوسىمشا كەڭەستەر بەرىلدى.
شارانىڭ ەكىنشى كۇنى قازاقستان جوعارى وقۋ ورىندارىنىڭ ستۋدەنتتەرى مەن ماگيسترانتتارىنا «Erasmus Mundus» بىرلەسكەن ماگيستر دارەجەسى جانە حالىقارالىق كرەديتتىك ۇتقىرلىق تۋرالى اقپارات بەرىلدى. ءوز كەزەگىندە شايزادا تاسبولاتوۆا باعدارلامانىڭ جاڭا جوبالارى، كونكۋرستارعا قاتىسۋ ەرەكشەلىكتەرى، كريتەرييلەر مەن ىرىكتەۋ راسىمدەرى، ۇلتتىق جانە ايماقتىق باسىمدىقتار تۋرالى بايانداپ، ەرازمۋس+ باعدارلاماسىنا قاتىسام دەۋشىلەرگە ارنالعان جوبالاردى قارجىلاندىرۋ بويىنشا پراكتيكالىق ۇسىنىستار بەردى. ءىس-شارا بارىسىندا ەراسمۋس+ باعدارلاماسىنىڭ ۇلتتىق كەڭسەسىنىڭ وكىلدەرى وزدەرىنە قويىلعان سۇراقتارعا تۇشىمدى جاۋاپتار قايتاردى.
ريمما جانبايەۆا
