«بۇگىن كورنەكتى مەملەكەت قايراتكەرى، ەلىمىزدىڭ گۇلدەنۋىنە ۇلكەن ۇلەس قوسقان جۇمابەك تاشەنوۆكە ەسكەرتكىش اشىپ وتىرمىز.
وسىعان دەيىن نۇر-سۇلتاندا ۇلى تۇلعامىزعا كوشە اتى بەرىلگەن بولسا، جۋىردا مەكتەپكە ەسىمى قويىلدى.
ەندى مىنە كەزەك ەسكەرتكىشكە كەلىپ وتىر. اعامىزدىڭ ءمۇسىنى كوميسسيا مۇشەلەرىنىڭ، زيالى قاۋىم وكىلدەرىنىڭ، ۇرپاقتارىنىڭ كەلىسىمىمەن قۇيىلدى. ءدال سونداي-اق ەسكەرتكىشتىڭ تۇرعان ورنى دا مۇددەلى تاراپتاردىڭ كەلىسىمىمەن تاڭدالدى.
بۇگىنگى ەلوردا وتانىمىزدىڭ تەك ساياسي عانا ەمەس مادەني جانە رۋحاني ورداسى. بۇگىنگە دەيىن نۇر-سۇلتاندا ەلىمىزدىڭ تانىمال تۇلعالارىنا ارنالعان ءبىرقاتار ەسكەرتكىش اشىلدى.
تاۋەلسىزدىگىمىزدىڭ 30 جىلدىعى قارساڭىندا پاندەمياعا قاراماستان ەلىمىزدىڭ رۋحانياتىن كوتەرەتىن باستامالار ارى قاراي دا جالعاسا بەرەدى»، - دەدى نۇر-سۇلتان قالاسى اكىمىنىڭ ورىنباسارى اسحات ورالوۆ.
ءوز كەزەگىندە ءسوز العان مەملەكەت قايراتكەرى، عالىم مىرزاتاي جولداسبەكوۆ ەلىمىزدىڭ وركەندەۋى جولىندا ەڭبەك ەتكەن اسىل ازاماتتارىمىز از بولماعانىن، سولاردىڭ اراسىندا جۇمابەك تاشەنوۆتىڭ شوقتىعى بيىك ەكەنىن ايرىقشا اتاپ ءوتتى.
سول سياقتى حالقىمىزدىڭ اردا تۇلعاسىنا ارنالعان ەسكەرتكىش قالامىزدىڭ كورىكتى ورىندارىنىڭ بىرىنەن اشىلىپ وتىرعانىن ايتا كەلە ەل رۋحانياتىنىڭ دامۋى جولىندا ەڭبەك ەتىپ جاتقان قالا اكىمدىگىنە العىسىن ءبىلدىردى.
«بۇگىنگى مەملەكەتتىك تۇلعاعا اشىلىپ وتىرعان ەسكەرتكىش تاۋەلسىزدىكتىڭ جارقىن جەمىسى. تاريحي تۇلعامىزدىڭ ءمۇسىنى ەلوردامىزدىڭ تورىنە ورناتىلىپ وتىر. قۋانىشىمىز قۇتتى بولسىن! جۇمابەك تاشەنوۆ ءوز ەلىنىڭ پەرزەنتى رەتىندە ەل الدىنداعى پارىزىن وتەگەن تۇلعا دەپ ەسەپتەيمىز»، — دەدى مەملەكەت جانە قوعام قايراتكەرى ورالباي ابدىكارىموۆ.
ال ۇرپاقتارىنان ۇلى سايان جۇمابەك ۇلى مەن كەلىنى فاتيما سادىق قىزى ءسوز سويلەپ، ەلباسىنا، مەملەكەت باسشىسىنا العىسىن ءبىلدىردى.
«جۇرت مەنەن اكەڭنىڭ اتىن نەلىكتەن ناسيحاتتامايسىڭ، ەلگە سىڭىرگەن ەڭبەگىن نە ءۇشىن ايتپايسىڭ دەپ سۇراپ جاتادى. ال مەنىڭ ويىمشا ەلگە سىيلى ازاماتتىڭ ەڭبەگىن حالقى ءوزى باعالاۋى ءتيىس. بۇگىنگى اشىلىپ وتىرعان ەسكەرتكىش حالىقتىڭ اكەمە دەگەن سىي-قۇرمەتى دەپ بىلەمىن»، - دەدى سايان جۇمابەك ۇلى.
جۇمابەك تاشەنوۆ ەسكەرتكىشىنىڭ ساۋلەتشىسى – ق.قورعانوۆ، ءمۇسىنشى – ە.ەرجانوۆ. ءمۇسىن قولادان، تۇعىرى گرانيتتەن قۇيىلدى، ەسكەرتكىشتىڭ جالپى بيىكتىگى 8،2 مەتر.
بۇگىندە نۇر-سۇلتاندا قالا تۇرعىندارى ءۇشىن تارتىمدى ورىندارعا اينالاتىن جاڭا قوعامدىق كەڭىستىكتى جايلاستىرۋ جۇمىسى بەلسەندى جۇرگىزىلۋدە. تاۋەلسىزدىكتىڭ 30 جىلدىعىنا وراي بيىل ەلوردادا مادەنيەت پەن جالپى ەلدىڭ دامۋىنا ۇلكەن ۇلەس قوسقان بەلگىلى قازاق قايراتكەرلەرىنە ارنالعان ەسكەرتكىش توپتاماسى اشىلدى.
بۇعان دەيىن قالادا الاشورداشىلارعا، دينا نۇرپەيىسوۆا، تالعات بيگەلدينوۆ، قانىش ساتپايەۆ سىندى تۇلعالارعا ەسكەرتكىشتەر قويىلعان بولاتىن.
سونداي-اق، نۇر-سۇلتاندا كۇن سايىن ادام ءومىرىن قۇتقاراتىن ءورت سوندىرۋشىلەر مەن مەديسينا قىزمەتكەرلەرىنىڭ قۇرمەتىنە مونۋمەنتتەر ورناتىلدى. بۇل جۇمىس جاستارعا رۋحاني، پاتريوتتىق جانە مادەني قۇندىلىقتاردى ناسيحاتتاۋ ماقساتىندا جۇرگىزىلەدى.
ايتا كەتۋ كەرەك، قالىپتاسقان ەپيدەميولوگيالىق جاعدايعا بايلانىستى ەسكەرتكىشتىڭ اشىلۋى ماسكا رەجيمى، الەۋمەتتىك قاشىقتىق سەكىلدى سانيتارلىق تالاپتاردى ساقتاي وتىرىپ ءوتتى.
