«Búgin kórnekti memleket qaıratkeri, elimizdiń gúldenýine úlken úles qosqan Jumabek Táshenovke eskertkish ashyp otyrmyz.
Osyǵan deıin Nur-Sultanda uly tulǵamyzǵa kóshe aty berilgen bolsa, jýyrda mektepke esimi qoıyldy.
Endi mine kezek eskertkishke kelip otyr. Aǵamyzdyń músini komısıa músheleriniń, zıaly qaýym ókilderiniń, urpaqtarynyń kelisimimen quıyldy. Dál sondaı-aq eskertkishtiń turǵan orny da múddeli taraptardyń kelisimimen tańdaldy.
Búgingi elorda otanymyzdyń tek saıası ǵana emes mádenı jáne rýhanı ordasy. Búginge deıin Nur-Sultanda elimizdiń tanymal tulǵalaryna arnalǵan birqatar eskertkish ashyldy.
Táýelsizdigimizdiń 30 jyldyǵy qarsańynda pandemıaǵa qaramastan elimizdiń rýhanıatyn kóteretin bastamalar ary qaraı da jalǵasa beredi», - dedi Nur-Sultan qalasy ákiminiń orynbasary Ashat Oralov.
Óz kezeginde sóz alǵan memleket qaıratkeri, ǵalym Myrzataı Joldasbekov elimizdiń órkendeýi jolynda eńbek etken asyl azamattarymyz az bolmaǵanyn, solardyń arasynda Jumabek Táshenovtiń shoqtyǵy bıik ekenin aıryqsha atap ótti.
Sol sıaqty halqymyzdyń arda tulǵasyna arnalǵan eskertkish qalamyzdyń kórikti oryndarynyń birinen ashylyp otyrǵanyn aıta kele el rýhanıatynyń damýy jolynda eńbek etip jatqan qala ákimdigine alǵysyn bildirdi.
«Búgingi memlekettik tulǵaǵa ashylyp otyrǵan eskertkish Táýelsizdiktiń jarqyn jemisi. Tarıhı tulǵamyzdyń músini elordamyzdyń tórine ornatylyp otyr. Qýanyshymyz qutty bolsyn! Jumabek Táshenov óz eliniń perzenti retinde el aldyndaǵy paryzyn ótegen tulǵa dep esepteımiz», — dedi memleket jáne qoǵam qaıratkeri Oralbaı Ábdikárimov.
Al urpaqtarynan uly Saıan Jumabekuly men kelini Fatıma Sadyqqyzy sóz sóılep, Elbasyna, Memleket basshysyna alǵysyn bildirdi.
«Jurt menen ákeńniń atyn nelikten nasıhattamaısyń, elge sińirgen eńbegin ne úshin aıtpaısyń dep surap jatady. Al meniń oıymsha elge syıly azamattyń eńbegin halqy ózi baǵalaýy tıis. Búgingi ashylyp otyrǵan eskertkish halyqtyń ákeme degen syı-qurmeti dep bilemin», - dedi Saıan Jumabekuly.
Jumabek Táshenov eskertkishiniń sáýletshisi – Q.Qorǵanov, músinshi – E.Erjanov. Músin qoladan, tuǵyry granıtten quıyldy, eskertkishtiń jalpy bıiktigi 8,2 metr.
Búginde Nur-Sultanda qala turǵyndary úshin tartymdy oryndarǵa aınalatyn jańa qoǵamdyq keńistikti jaılastyrý jumysy belsendi júrgizilýde. Táýelsizdiktiń 30 jyldyǵyna oraı bıyl elordada mádenıet pen jalpy eldiń damýyna úlken úles qosqan belgili qazaq qaıratkerlerine arnalǵan eskertkish toptamasy ashyldy.
Buǵan deıin qalada alashordashylarǵa, Dına Nurpeıisova, Talǵat Bıgeldınov, Qanysh Sátpaev syndy tulǵalarǵa eskertkishter qoıylǵan bolatyn.
Sondaı-aq, Nur-Sultanda kún saıyn adam ómirin qutqaratyn órt sóndirýshiler men medısına qyzmetkerleriniń qurmetine monýmentter ornatyldy. Bul jumys jastarǵa rýhanı, patrıottyq jáne mádenı qundylyqtardy nasıhattaý maqsatynda júrgiziledi.
Aıta ketý kerek, qalyptasqan epıdemıologıalyq jaǵdaıǵa baılanysty eskertkishtiń ashylýy maska rejımi, áleýmettik qashyqtyq sekildi sanıtarlyq talaptardy saqtaı otyryp ótti.
