ەلوردادا جاقىندا اشىلعان گاسترونوميالىق ورتالىقتا Astana Food Fest فەستيۆالىنىڭ قىزىقتى وتۋىنە ءتۇرلى ۇلتتاردىڭ تاعامدارىن دايىنداپ، ۇسىناتىن 30-دان استام تانىمال قوعامدىق تاماقتانۋ ورىندارى دا اتسالىستى.
كەش قوناقتارىنا مادەني-ويىن-ساۋىقتىق باعدارلاما ۇسىنىلىپ، بەلگىلى رەستوراتورلار ءوز جەتىستىكتەرى تۋرالى اقپاراتتارمەن ءبولىستى.
– قۇرمەتتى قالا تۇرعىندارى مەن قوناقتارى، مۇنداي ءىس-شارالاردىڭ ءتۋريزمدى دامىتۋداعى ماڭىزى زور. سوڭعى جىلدارى تۋريستەر قۇندىلىعى وزگەردى، ءقازىر گاسترونوميالىق تۋريزم قارقىندى دامۋدا. تۋريستەردىڭ 40 پايىزى باسقا ەلدەرگە وسى ماقساتتا باراتىنى بەلگىلى. سەبەبى بەلگىلى ءبىر ەلدى ونىڭ ۇلتتىق تاعامدارى ارقىلى تانۋعا بولادى.
ەلوردانىڭ دا گاسترونوميالىق تۋريزم ورتالىعى رەتىندە دامۋىنا الەۋەتى جەتەدى. قازىرگى تاڭدا باس قالادا 1765 قوعامدىق تاماقتانۋ ورنى جۇمىس ىستەسە، سونىڭ ىشىندە 298 مەيرامحانا، 534 كافە، 93 بار، 539 اسحانا جانە 301 وزگە دە نىساندار بار.
بۇگىن فەستيۆال ءوتىپ جاتقان گاسترونوميالىق ورتالىق تۋريستەر مەن ەلوردا قوناقتارىنىڭ ەڭ كوپ شوعىرلاناتىن دەمالىس ورنىنا اينالارىنا سەنىم مول، – دەدى قالا اكىمىنىڭ ورىنباسارى ەرلان بەكمۋرزايەۆ فەستيۆالدىڭ اشىلۋ سالتاناتىندا.
وسى دەمالىس كۇندەرى گاسترونوميالىق ورتالىققا كەلگەن استانالىقتار فۋد-فەستيۆال ۇيىمداستىرۋشىلارىنىڭ ءتۇرلى كونكۋرستار مەن پريانيكتەردى بوياۋ، جىلدام تاماق جەۋ، ۆيكتورينالار، مامانداردىڭ شەبەرلىك سىنىپتارى سياقتى ءتۇرلى ءىس-شارالارعا قاتىستى.
– ەلوردادا مۇنداي شارالاردى وتكىزۋگە ارنالعان ورىنداردىڭ پايدا بولعانى قۋانتادى. ەندى ولاردىڭ قاتارى ارتتىرۋ كەرەك. ءدال وسىنداي فەستيۆال جاز ايلارىندا دا وتكەنى دۇرىس. كەلەتىن قوناقتار ءۇشىن بۇل ۇلكەن مەرەكە. ويتكەنى ول ءبىر نىساننىڭ ىشىندە ءتۇرلى تاعامداردان ءدام تاتادى. بۇگىن ولار مەنىڭ امەريكاندىق تاعامدارىمنىڭ ءدامىن كورەدى، ەرتەڭ جىگىتتەردەن گاۆايي تاعامدارىنىڭ ءدامىن كورسە، ءبىرىسى كۇنى ناۋبايحاناعا بارادى. سوندىقتان ءبىز ءۇشىن جالعا الۋشىلاردىڭ ءارقايسىسىنىڭ جاقسى جانە ساپالى جۇمىس ىستەۋى وتە ماڭىزدى، – دەدى گاسترو-كورنەر يەسى رۋسلان ابىشيەۆ.
ءىس-شارا بارىسىندا گاسترو-كورنەر يەلەرى قوناقتاردى گاسترونومياداعى جاڭا ترەندتەرمەن تانىستىرىپ، ارنايى تاعامدار مەن دەسەرتتەردەن ءدام تاتقىزدى.
سونىمەن قاتار، بالالارعا ءتاتتى تاعامداردى ادەمى بەزەندىرۋدەن شەبەرلىك ساباقتارى وتكىزىلىپ، كوفە دايىنداۋدان ەڭ وزىق باريستەر قابىلەت-قارىمىن كوپشىلىك الدىندا كورسەتتى.
حوت-دوگ پەن بۋرگەردى جىلدام جەپ تاۋىسۋدان جارىسقاندار دا، باسقا دا قاتىسۋشىلار ءىس-شارا دەمەۋشىلەرى اتىنان ءتۇرلى سىيلىقتارعا يە بولدى. Live-بەند جانە دي-دجەيلەر كوڭىلدى زاماناۋي اۋەنمەن كەلۋشىلەرگە مەرەكەلىك كوڭىل-كۇي سىيلادى.
گاسترونوميالىق ورتالىقتا قازاق تاعامىنان باستاپ بولەك الەمنىڭ 28 ۇلتتىق تاعامدارىنىڭ ءدامىن تاتۋعا بولادى.
